Ominista ikulu yehongo Katrina Hanse-Himarwa ota ka pewa efudiko lopambelewa.
Ombelewa yOmupresidente Nangolo Mbumba okwa dimina okuyandja efudiko lopambelewa kominista ikulu noshoyo okuyandja etumbaleko.
Efudiko lopambelewa ola yandjwa konima eshi okakomitie ke lile po okutokola omafudiko opapangelo noopambelewa ka yandja omayelele komupresidente kutya Himarwa okwa pumbwa okufimanekwa nefudiko lopambelewa.
Hanse-Himarwa okwa xulifa momafiku 14 Juli koshipangelo shaRoman Catholic moWindhoek molwomukifi wokaanghelela.
Okwa xulifa mepupi lomido 57.
Ota ka fudikwa Olomakaya komaendo kodoolopa yaMariental koshitukulwa shaHardap.
Hanse-Himarwa okwa li omuhongifikola keifano, ngoloneya woshitukulwa shaHardap manga ina ulikwa a ka ninge ominista yehongo momudo 2015. Okwa longa oshilonga eshi fiyo momudo 2019.
Minista wehongo mukulu ou okwa ningilwa oivilodimbuluko ya yooloka koWindhoek omo oshiwana she mu tanga ongomukainhu kwa li a fimaneka ehongo. Omupresidente Mbumba oye umwe womovaleli a yandja etumwalaka lomahekeleko kofamili yaHimarwa.
Okwa ti Himarwa okwa longa noudiinini okuyambula po oshikondo shehongo pefimbo kwa li minista yehongo.
Omushamane waye Ghenno Himarwa okwa hokolola ta ti omukulukadi waye okwa li omutekuli, omunambili noshoyo omuyandjimayele.
Omonakadona Philaney Himarwa ou kwa li ta popi ponhele yavamwaina koshivilodimbuluko sha li kongeleka Tanindare Parish, okwa ti ina okwe va tekulila efimano lehongo.
“Otwa mana elihongo letu paife molwaashi meme okwa li alushe e hole oku tu yambidida noku tu kumaida tu lihonge nondjungu. Otwa pandula meme kwaaishe e tu ningila,” ta ti.
Ombelewa yaMinista yehongo nayo okwa li ya ninga oshividimbuluko omo ovanambelewa va yooloka va tanga Hanse-Himarwa tava ti okwa li omuleli e hole ovanhu, efimbo keshe ta yolo noshipala shi hadi ombili.
Oshikondo shehongo otashi tange Hanse-Himarwa ongomuleli kwa li muwa e na elongelokumwe nombili noshiwana.
Hanse-Himarwa okwa fiya ko omusamane waye Ghenno, ounona vane novatekulu vane. Okwa fiya ko yoo ovamwaina vatano novakulunhu vaye ovo aveshe ve li mepipi lomido 80 nasha. Ovakulunhu vaye ovo ovanhu votetetete va eta ongeleka yoPentecostal moNamibia.
-fhamalwa@nepc.com.na