ONGWEDIVA- Omalelo opamifyuululwakalo okwa kumaida oshiwana opo shi longe noudiinini momapyava avo ndele ha ku pitila eengula keendingosho molwashi osha puka. 

Onghela ovaleli vopamifyuululwakalo okudja komalelo a yooloka okwa popya taa ti e li olo efimbo liwa lokulonga momapya shaashi odula oi li metifa paife. 

Ohamba yOvakwanyama mekulu Martha Mwadinomho yaKristian Nelumbu okwa ti okwa lombwela oovene vomikunda aveshe opo va kwashipaleka kutya otava shange ovanhu tava patulula eendingosho eevili dongula. 

“Ina ndi hala okuuda ovanhu tava kondjifafana noovene vomikunda ngeenge tava lombwela ve li ufe komilandu da tulwa po,” ta ti. 

Okwa ti okwa hala oshitunda shaUkwanyama shi kale shina eelandulafano novanhu ve na oukumwe nombili. 

“Paife efimbo lokulonga momapya. Keendingosho ka kuna eshi ta kudi. Longeni momapya e ni opo mu dule kumona mo oipalwifa ya wana,” ta ti. 

Elenga la kula ta li wilike oshitunda shaUukolonkadhi Malakiya Shoombe ola popya ta li ti oshiwana osha shivifilwa nale kutya ngeenge omunhu okwa patulula ondingosho eevili dongula ota pewa ehandukilo. 

“Oshi li oshinakuwanifa sha mwene womukunda opo a kwashipaleke kutya momukunda waye omu na ovanhu tave li ufa keemhango da tulwa po,” ta ti. 

Okwa weda po ta ti ombelewa yaye ohai yambidida ovanhu ovo va pumbwa eembuto dokukona momapya avo. 

Okwa kumaida oshiwana opo shi longele kumwe noovene vomikunda nokukala tashi longifa omapya avo pamukalo muwa. 

Elenga la kula loshitunda shUukwambi Chief Ndilimani Iipumbu naye okwa ti ombelewa yaye itai popile omunhu ta  patulula ondingosho eevili dongula. 

“Otwa tula po omilandu opo eendingosho ndi patululwe okudja potundi 13h00,” ta ti. 

Okwa pandula oshiwana shomoshitunda shaye eshi tashi li ufa komilandu molwashi fiyo opapa ka pena omunhu a lopotwa a patulula ondingosho eevili dongula. 

fhamalwa@nepc.com.na