OSHAKATI – Elelo lyondoolopa lyOshakati otali hiya oosipana dhokatanga kokoompadhi dhi inyolithe opo dhi kuthe ombinga momaudhano gekopi lyaMayola ngoka taga ka kala ko okuza mesiku lyotango sigo gane gaMei nuumvo. 

Elelo lyondoolopa lyaShakati olya pititha omushangwa kutya omaudhano ngoka otaga ka ningwa oshikando oshitihamano. 

“Omumvo nguka omaudhano ngaka otaga ka kala ga yooloka komakwawo agehe ga ningwa omimvo dha piti, oshoka omwa ningwa omalunduluko,” ta popi ngaaka. 

Elelo lyondoolopa, olya topola omaudhano gokoompadhi moongundu mbali. 

Ya nyola kutya ongundu yotango oyaamati yaanyasha, mboka taya ka topola oshimaliwa shoN$60 000. 

Kehe ongundu otayi ki inyolitha koshimaliwa N$1 200. 

“Osipana tayi ka sindana otayi ka mona oshimaliwa N$35 000, ekopi osho wo oombandi dhoshingoli dhi li 18. Osipana tayi ke ya puutiyali, otayi ka sindana oshimaliwa shoN$20 000 noombandi dhoshisiliveli dhi li 18. Osipana ya landula ko otayi ka mona oN$5 000,” ta fatulula ngaaka. 

Okwiinyolitha kwongundu ontiyali oku na N$1 000 kehe mosipana kehe. Oshimaliwa tashi ka topolwa mongundu moka oN$28 500 ndjoka ya kwatela mo oombandi. 

Osipana yotango tayika sindana oshimaliwa shoN$15 000 noombandi dhoshingoli dhi li 18, ontiyali otayi ka mona oN$10 000 noombandi dhoshisiliveli 18. 

Elelo lyondoolopa lyaShakati otali kumagidha oosipana ndhoka dhi na ehalo okukutha ombinga momaudhano moka, ya tameke okwiinyolitha nena. 

Ya nyola kutya omaudhano ngoka otaga ka kala wo gena aanangeshefa aashona taya ka pewa uutala, ashike uuyelele mboka otau ka pitithwa momasiku omashona ga taalelwa. 

Ya ti, omaudhano ngoka ohaga gongaleke nokunyanyukitha oshigwana. 

-vkaapanda@nepc.com.na