ONGWEDIVA – Elelo lyondoolopa yaShakati olya pititha omutengenekwathanekwa gwoomilliona N$186, 175,649 gwomumvo nguka oshowo gwomvo tagu ya. Elelo lyondoolopa olya tokola kutya iifuta mbyoka hali pula aakwashigwana itayi ka gwedhelwa nuumvo omolwomukithi gwoCovid-19 ngoka gwa kanithitha oshowo gwa shunitha iiyemo yoyendji pevi.
Mayola gwondoolopa yaShakati Angelus Iyambo okwa ti, oya thaneke okulongitha oshimaliwa shi thike poomilliona N$57, moka taya ka longitha oku unga ondoolopa noku yi humitha komeho. “Ngaashi sha shiwika nawa kutya Oshakati ohashi adhika kefundja nomagumbo ogendji ohaga kala kohi yomeya, otwa thaneke okulongitha iimaliwa ya thika poomilliona N$15 okutunga oontopa dhomeya kaaga talame we, opo ga pite ga manguluka sigo okoshana hoka ga uka,” Iyambo ta ti ngaaka.
Okwa gwedha po ta ti, elelo lyondoolopa olya thaneka natango okulongitha oshimaliwa okwoopaleka omahala koExtention 5 oshowo 6. Natango otaya ka longitha oshimaliwa sha thika pomilliona N$1,5 okutembudha aakalimo yomolukanda Sky okuyafala kOnawa komahala ngoka taga opalekwa ngashiingeyi.
Momutengenekwathaneko gwawo, oya popi kutya otaya ka tunga nawa oondama dhonyata kEvululuko Etiyali, nokwaandjaneka omalusheno momudhingoloko gwOkandjengedi.
Iyambo natango okwa popi kutya oye na etoto lyiiyagaya ayihe mondoolopa ndyoka ka li li monkalo ombwaanawa noya thaneka oku li longuthulula noshimaliwa shi thike poomilliona N$1.8. Elelo lyondoolopa natango olya thaneke oku opaleka ehala lyomayinyanyudho tali ithanwa Carribean ndyoka lya kala ly ili monkalo kaayi shi ku talwa, moka mu na omahala giinyangadhalwa oyindji noga yooloka oshowo ehala lyomayinyanyudho ndyoka lyi li kEkuku.
Moopoleyeka dha landula ko omwa thanekwa okutungwa opate ndjoka ya pita mOneshila ya uka kEhenye. Natango mwa kwatelwa Ethanekululo lyomalukanda Okandjengedi, Onawa oshowo Evululuko. Natango oya thaneke okutula omayendo ge li gaali omakulu gaShakati ondhalate oshowo okutunga omayendo omape gaKatana. “Onda inekela kutya kehe shoka tashi inyenge nenge tashi longwa pethimbo ndika momudhingoloko gwaShakati, ethano ewanawa kutya elelo lyondoolopa yaShakati otali longo nelalakano lyokuhumitha komeho ondoolopa moshili,” Iyambo a popi ngaaka. Iyambo okwa yelitha kutya elalakano lyokutunga ondoloopa, okuhumitha komeho ondoolopa oshowo okuyambula po onkalo yaakalimo yel i momalukanda okuyatula monkalo yil i hwepo.