Elelo lyondooopa lyOshakati olya tokola okudhima po oondjo dhaantu ya hula ko nale osho wo okugandja ompito okulundulula omadhina kwaamboka ye ga thigulula po.

Mayola gwelelolo lyondoolopa yaShakati Leonard Hango okwa koleke oshinima shika ta ti, elelo olya tokola ngaaka notali shi tula miilonga methimbo efupi.

“Oongunga adhihe tadhi ka dhimwa po kelelo otadhi kotha oshimaliwa oomilliona N$5, ihe shoka otashi ningilwa ashike mboka ya hula ko nale,” ta popi ngaaka.

Omunashipundi gwokomitiye melelo lyondoolopa yaShakati Hofni Mutota okwa li a ningi eyindilo kelelo lyondoolopa opo aantu ya hula ko nale omimvo dha thika 10 oshowo  20 ya dhiminwe po oondjo dhawo.

“Elalakano okugandja ompito kaantu mboka ye li momagumbo paife ya tamukululeko nepandja limwe lya yela, dho oondjo ndhoka dha kala ko dhi dhimwe po kelelo,” Mutota a yamukula ngaaka pangodhi.

Ta ti, ohashi kala oshidhigu okufuta ko oondjo ndhoka omuntu a adha po nale, onkene elelo otali gandja ompito ndjika opo ya zuulule ko.

Hofni okwa ti, aantu mboka natango otaya pewa ompito opo ya lundulule omadhina  okuza kedhina lyanakusa tali yi kwaangoka lya nuninwa.

“Omagumbo ogendji ge li moondjo, omolwomayakulo haga gandjwa kelelo inaaga futwa, ngaashi omeya, nomayakulo galwe,” ta fatulula ngaaka.

Silas Shivute omukalimo gwomolukanda Oneshila okwa ti onkundana ndjoka otayi nyuwitha omakutsi oshoka oya kala uule nethimbo ye li muupyakadhi oshoka ye na oondjo dhamuni.

“Aakuluntu yetu oya hula ko omimvo 13 dha piti, oshoka katwa li tu na iiyemo yasha otwa yi moondjo, nomeya getu oga tetwa ko. Ngashingeyi omimvo adhihe dha piti otwa kala nokuteka puushiinda, oshoka ita u vulu okufuta oongunga ndhoka dhi li ko,” ta hokolola ngaaka.

Ta ti, shoka ngele osha ningwa otashi ka mangulula oyendji ya taalela uupyakadhi ngaashi wawo.  –vkaapanda@nepc.com.na