Oshakatis hîa Oshana ǀkharib !nâ ǁgoes di ǂhanusi ǀaeǁgâub ge ge ǂanǂan, ǂōǂōsib !oabadi !aroma ra sîsenūhe auton ǀonǂgais ai ambulandi tsî bēgu ǀae-aon hîa kai!ā ǀaeǁgâugu, aiǁgause ǀAeǁgams khami in ǁga ǀae!khōdi !aroma ra ǁnaeǁgauhen ra !nari-ūhen ge daob ai hâs ǂgaoǀkhādi ai dīǀoaǀoa tama hâ tsî !naorasiba !khōǂgā hâ.

Nē ǀaeǁgâub sîsenao-i hîa ǀons â-e ǂanhesa go ǂkhā-i !oagu i ge nē ambulandi tsî bēgu hîa ǀhaob ai a koron di lesenside ǀnai 2016ǁî kurib !nâ ge !gûǀam tsî noxopa ǀasaǀasahe tama hâ, tsî ǁnā-amaga mā-ams ose daob ai hâ. 

Nē bāgu tsî ambulan !nari-aogu ge !nuri!nādi kōse daob !norasasib mâisan xa ra xoahe tsî -îgu !oagusa ǂhâbasa tama hâ mariǂkhôasa ministerisa !khōǂgāba hâ. “Sige ge hoaǁae ra xoahe tsî ǀnîna aitsama ra mātare, ministeris ga gaxuse mātares ǀkha a ū-o, !khōhesa ǁkhaubasens ase,” tib ge ǀgui !nari-aoba nē ǂhôare!khaiba gere mîba.

 ǀGamra nē ǂōǂōsib auton dira ge a 2009 di tsî ǀnî ǀgamra 2015 !nâ ge ǁamahe. Nissan NV350 ambulans ge ǀgui !nāsa wekhekorobe ǀAeǁgams ǁga ra !nari-ūhe, !Khanna xu Hôaosoreb kōse, tsî ǀnî ǁaeba ǂōǂōsi-i nî hâs hoasa. Nē mâsib ǂnamipeb ge a ǀgūhe soab aib ge dana direkteri, ministeris ǂurusib tsî ǀhūhâsi !oabadi dib Ben Nangombeba ge mî, ǁnā autodi daob ai a hâ ǁkhā xawe lesensidi ǁaeb ǀasaǀasas dib ǀguiba !kharu hâsa. 

Nangombeb ge ge mî, -ǁîb ge Oshana ǀkharisi direktera a mîmāsa îb ǁawoǁawo nē ǁhōb nî oresa hōsa. Ai!âb ge Nangombeba noxopa a mîs ge ǁîb ra !âubasen tsî ǂgaoǀkhāsa direktern nî ǀkharisi !harib ai !gao!gao xūna ǁaeb ai ǁnāpa dītoasa, îs ministerisa kai ǁhōn ai ǂâisa ǂnûi. 

“Nē ministeris !uru ǂâibasens ge khoen ûiga sâusa, tsî da nî mā-am daob ai hâ tama tsî ǁaeb ai kō!gâsa tama auton ǀkha ǀae-aona !nari-ūsas kara, os ge dana !aromas nē ministeris disa xū-i tsîna harebe tama hâ,” tib ge ge mî. “Hanan ga ǁnā ǂkhari xūron tsîna nî dīǁoas kara, on tsēsa xu tsēs ǁga tarena ǁnā berodi !nâ ra dī? An ǀkharigu khoena ǁîn sîsenga dī tsî nauna tā taotao,” tib ge gere ǁgui!ā.