Iitopolwa Oshana nOshikoto oya gandja omakwatho koshitopolwa shaMusati shoka tashi pi komulilo okuyambindhindha aanambelewa mboka taya kondjitha okudhima omulilo. 

Oshitopolwa shaShana osha gandja iikulya niikunwa, ngaashi uundini womeya, oohi dhoondooha, omagadhi gokulya, oosopa osho wo oomboloto, omanga oshitopolwoa shaShikoto sha gandja uundini womeya, uupakete wunamunate, oondooha dhoohi, omagadhi gokulya osho wo uusila wepungu. 

Ngoloneya gwoshitopolwa shaShana Hofini Iipinge okwa ti oya yambindhindha ngaaka onguukwawo waNankali. 

“MOshiwambo ohaku ti popila mukweni ta lika oshoka ngula ongoye. Nonando oshitopolwa shetu nasho sha gumwa ngaaka, kashi shi ngaashi omulilo ngoka  tagu pi kOmusati,” Ta popi ngaaka. 

Iipinge okwa ti okashona hoka  ya gandja okuyambindhindha aanambelewa mboka taya longo nuundhiginini okukwashilipaleka kutya omulilo ogwa dhima. 

Ngoloneya gwoshitopolwa shaShikoto Sacky Kathindi okwa ti  nayo oya gandja omakwatho ngoka okukwathela aanembelewa mboka ye li mokuti. 

“Kashi shi oshipu okukala mokuti nondjala osho wo nenota onkene aanambelewa otaya pumbwa omakwatho getu opo ya kale wo ye na oonkondo okudhima omulilo ngoka,” ta popi ngaaka. 

Ngoloneya natango okwa indile wo oshigwana opo shi yambidhidhe aanambelewa ye li mokuti naashoka ye na po. Omulilo koshitopolwa shaMusati ogwa tameke oshiwike sha zi ko sho ngoka gokEtosha gwa dhimwa thiluthilu. 

Ngoloneya gwoshitopolwa shaMusati Immanuel Shikongo okwa ti omulilo ngoka otagu kwata ethimbo okudhima omolwombepo nokafudhayela hoka ihaka pititha po ethimbo inaaka pepa. 

Ta ti, omulilo ngoka otagu mbugaleka onkene ogwa pumbwa okudhimwa mbala. 

-vkaapanda@nepc.com.na