Auleria Wakudumo
Kakukutu kopolifi Inspector General Joseph Shikongo okwa holola kutya opolifi otai ka tula oufano momapandaanda moshitukulwa shaShana okukondjifa oimbuluma.
Shikongo eshi okwe shi holola pefimbo ta kundafana oyeetifi yoimbuluma novakwashiwana vomomukunda Adolf moshitukulwa shaShana.
Kakukutu kopolifi okwa ti oufano otava ka tulwa mOndangwa, Oshakati osho yo mOngwediva okushunifa oimbuluma pedu.
“Otwa hala oshiwana shetu shi ende sha manguluka, shi li mombili momapandaanda. Inatu hala oshiwana shetu tashi lombwelwa kutya nashi ende neengodi da fa peni keembudi voo tava dengaadengwa nokunyekwa oinima yavo,” Shikongo ta ti.
Oufano otava ka kala tava faneke keshe osho tashi linyenge momapandaanda oufiku nomutenya hano o24/7 okufaneka keshe osho tashi longwa sha puka keembudi mOshana.
“Otava ka faneka yo peenhele dendiki lomangeshefelo, peengeshefa dopaumwene,” Shikongo ta ti.
Kakukutu kopolifi okwa holola kutya ova tula nale oufano vamwe modoolopa yaShakati, mOngwediva nomOndangwa.
“Eshi tu li mombelewa yomukulunhu wopolifi moshitukulwa shaShana, Commissioner Naftal Lungameni Sakaria, otu wete kOkandjengedi fiyo okOngwediva akushe kwinya,” Shikongo ta ti.
Oufano otava ka kwafela opolifi okukwata eembudi noupu osho yo okushunifa oimbuluma pedu.