ONGWEDIVA – Ovakalimo vomOlutanda moshitukulwa shaShana ova lombwela oshifokundaneki eshi nokuhokolola nghee tava vakwa oimuna yavo kovanhu vehe shiivike pomukunda.
Umwe womwaavo va vakwa oikombo Petrus Ugwanga okwa ti pomukunda ohapu holoka okahauto kokatuukala koDankie Botswana pefimbo loufiku kehe shiivike. Okwa twikila ko kutya okaDankie Botswana koluvala litoka oka didilikwa oko haka tutu eengobe opamwe noikombo ei hai kana pomukunda.
“Eshi ohatu shi mono luhapu ongula ngeenge twa tameke okushikula omalola okatuwa. Luhapu ohatu mono eshi omakondo, unene tuu eengobe hama kala a kokoloka pedu shaashi ongobe itai wana mo mokatuwa. Neudo otwa kanifa eengebe da fika punhano fiyo hamano lwaapo,” Ugwanga ta ti. Ova hokolola yoo kutya omafiku aa natango ope na eumbo limwe la vakwa oikombo itatu poshikando, omanga omaumbo avali a vakwa keshe limwe oshikombo shimwe. Ova twikila ko yoo kutya oshivike sha dja ko natango ope na umwe e na oufita aushe weengobe wa shingwa moshuunda pefimbo loufiku. Eengebo vati eshi da ka monika ongula, imwe oya hangika ya fya, noponhele opa hangika ashike oushosho nomandjadja.
Uugwanga okwa tumbula kutya vahapu ohava ka landifa ombelela yoimuna ei momatala nomomapandavanda aShakati. Omwedi wa dja ko ope na vamwe va tulwa moipandeko, konima eshi va hangika tava landifa ombelela yoikombo mOshakati ya vakwa.
Ugwanga ota kunghilile ovakwashiwana vomomudingonoko wavo va kale ve li oshanda novanhu vape momukunda. Ota indile yoo keshe tuu ou ta ka mona okatuwa kokaDankie Botswana pomukunda e mu shiivifile opo va dule oku ka kwata nokudengela opolifi.
Omupopiliko wopolifi mOshana Thomas Aiyambo okwa ti okudja muJanuali fiyo oJuni neudu opolifi oya patulula oiboifa ya fika po 62 i na sha nevako loimuna momaumbo. Okwa tumbula kutya eembudi doimuna ohadi ka landifa kovanhu ava hava landifa oupana. “Keshe too ou to ka landifa okapana paife kala u na eembapila doshinamwenyo eshi to landifa de lixwa po. Inatu hala vali omunhu to ka hangika nokapapa koshimuna sha file odula ya dja ko, ove to ti osho neudo shaashi ohatu ke ku manga po,” Aiyambo ta tumbula.
Okwa kunghilila yoo keshe ou e na oshuunda shi li kokule neumbo eshi ehenife popepi neumbo. “Ovanhu nava kale yoo hava penduka eengula dakula opo va kale hava tale eshi sha lele koyuunda yavo, nokushikula eemhadi doulunga,” Aiyambo ta ti.