WALVIS BAY – Osheendo shaanenentu sha kwatela mo oominista dhopevi oshi li moshitopolwa shErongo uule womasiku gatano opo shi mone uuyelele wothaathaa kombinga yomukithi gwoCovid-19 moshitopolwa. Osheendo osha kwatela mo aapeviminista okuza kuuministeli womayambulepo goondool opa osho wo iitopolwa yokuushayi, wiilonga, omakwatathano giilonga netotepo lyoompito dhiilonga, elongo, wiikwameni, wegameno osho wo wuuhaku. 

Osipana ndjika ya kwatelwa komeho kominista yopevi yiilonga Hafeni Ndemula, okwa tegelelwa yi ka konaakone onkalo nokugandja omayele kutya epangelo nali ka longe nomukalo guni okukeelela omukithi nguka kagu taandele. 

“Pethimbo tatu ka kala mpaka, otatu ka talela po omahala gokwiikalekelwa opo tu tale kutya oge li monkalo yini ngele tashi ya kutya aantu monkalo yini, iikulya osho wo ngele ope na omayambidhidho gopamadhilaadhilo. “Otatu ka kundatahana wo nokakomitiye komafumviko hoka ka tulwa po tu pule ngele ope na omashongo gontumba, osho wo tu kwashilipaleke kutya oonakusa yoCovid-19 otaya ka fumvikwa nesimaneko, manga taku iyuthwa wo koonkatu dhegameno,” Ndemula ta ti ngaaka. 

Omupeviminista ta indile wo koshigwana shaa nyane nokuyoolola mboka taya kwatwa kocorona, oofamili dhawo, nenge aaniilonga pamwe nayo, ashike nakulongelwe kumwe opo ku monike omayamukulo gokupotokonona omukithi nguka. 

Ngoloneya gwoshitopolwa shErongo Neville Andre-Itope, sho a li ta popi nosipana ndjika okwa li a popi kutya nonando pwa li pwa tulwa ethanekodhilaadhilo miilonga sho moshilongo mwa monika omuki t h i oshikando shotango, okwa ti hamalalakano agehe ga adhika. “Omwaalu gwaantu mboka ya pumbwa oku ikalekelwa moshitopolwa ngashiingeyi ogwa pitilila omahala moka aantu ye na okikalekelwa,” 

Andre-Itope ta ti ngaaka. Ta gwedha ko kutya ope na ondungethaneko ompe tayi ka tulwa miilonga okukeelela etaandelo lyomukithi nguka. Ta ti ondungethaneko ndjika unene otayi ka tala poWalvis Bay noKuisebmond, ndjoka oyo unene ya dhengwa pomutima. -Nampa