WINDHOEK
Ehangano lyomeya moNamibia, NamWater oshowo okampani yedhina UraMin Namibia metitano lya zi ko oga tseyitha oprojeka yopamuhanga okutunga oshidhinditho shomeya gomefuta shoka tashi ka etitha pu tungwe iidhinditho yomeya gefuta poSwakopo.
Oprojeka ndjika otayi ka kwatela mo etungo lyiidhinditho iyali, shimwe otashi kala tashi nokupomba omeya okuza mefuta, nomeya gookumbiki dha konda oomiliyuna 50 dhomeya gokunuwa nokulongithwa otaga ningi haga dhindwa komumvo, koshidhinditho shoka tashi ka kotha okapandi koomiliyuna 140 miimaliwa yaAmerika.
Eitulomo enene lyehangano UraMin okutunga po oshidhinditho shika olya etithwa kedhiladhilo lyehangano ndika okutota po ishewe omina yalyo ontintatu onene moNamibia poTrekkopje popepi noSwakopo.
Oshidhinditho shoka tashi ka tungwa omukaakena gookilometa ndatu lwaampoka kuumbangalantu woWlotzkasbaken, otashi ka kala hashi gandja wo omeya kOmina yaTrekkopje oshowo okuyakula mompumbwe yomeya kookasitoma dhaNamWater moshitopolwa Erongo.
Etungo lyoshidhinditho okwa tegelelwa li ka tameke shampa ashike lya ziminwa notali ka pwa kuyele momumvo 2009.
Iidhinditho yomeya goshimongwa okuza mefuta okwa li ya tseyithwa pambelewa momumvo 1998, sho NamWater okwa li a taalelwa kompumbwe onene yomeya moondoolopa nomahala gokomunkulofuta.
Omukuluntuwiliki goNamWater, Dr. Vaino Shivute, okwa kundaneke iikundaneki metitano kutya oshidhinditho shoka otashi ka dhinda omeya gookumbiki oomiliyuna 45 lwaampoka omvula kehe.
Ookumbiki 25 dhomeya ngoka taga ka dhindwa oga nuninwa ookasitoma dhaNamWater. Oshitopolwa Erongo ohashi longitha ookumbiki oomiliyuna 12 dhomeya komumvo, moka Ombaye hayi longitha ookumbiki ne oshinkwanu ndatu dhomeya, Omina yaRio Tinto -Rǟ