Omulumenhu weedula 23, omukwashiwana waAngola okwa kwatwa po Etivali eshi a dipaa nokukala ta denge ovanhu keendingosho vehe na eshi va ninga.
Poshiningwanima eshi osha twala omunhu umwe mefyo, nanakufya okwa tongololwa oye Thomas Tuhafeni weedula 34, omukwashiwana waAngola.
Omupopiliko wopolifi moshitukulwa shaShikoto Inspector Ellen Nehale okwa hokolola ta ti omufekelwa okwa ponokela peendingosho dedina Ombwata pomukunda Onashiye pamwe novalumenhu vanhe nomukainhu umwe efimbo lokomatango lopotundi 19h00.
Opolifi oya ti omufekelwa pamwe nosheendo shaye ova tameka tava denge keshe omunhu va hanga peendingosho mexuliloshivike mOlomakaya.
Nakuninga oshihakanwa mboli okwa kwata onghone eshi mefiku la landula ko lOsoondaxa va shakena poundingosho ndele ta tameka okudenga
omufekelwa.
Opolifi oya ti konima yokafimbo omufekelwa okwa faduka po a uka keumbo lavo ndele ta ka tala ondjebo.
Vati eshi omufekelwa e uya okwa yasha mukwao nondjebo monhulo fiyo ta xulifile peendingosho opo.
Ovakwapata vaye ova shivifilwa efyo laye nomakonakono opolifi otaa twikile.
Okwa didilikwa ovakwashiwana vaAngola va ninga oihakanwa yokukwatwa po eshi hava longo okulonga yoimbuluma yokukala tava dipayafana.
Oshivike sha dja ko moshitukulwa shaMusati omwa lopotwa omulumenhu Omuangola a dipaa mukwao yoo naye Omuangola eshi vati kwa li tave liningi omashendjo kutya keumbo lavo oku na ondjala.
Moshitukulwa shaMusati neudo omwa lopotwa yoo vali omukainhu weedula 22 a dipaa ohanana yaye ndele te i fudike i na omwenyo.