Ehangano tali ithanwa Erongo Offshore olya pititha omushangwa kutya otali kaninga oshigongi shotango sha simana shina sha niikwamahooli oshowo omuku, shoka tashi ka gandja omauyelele agehe taga pumbiwa.

Omuwiliki gwehangano Erongo Offshore Safety Conference   Knowledge Ndunge Ipinge okwa ti, oshigongi shoka otashi ka kala ko mesiku 1 sigo 2 gaMei nuumvo. “Sho ta tu tameke nepandja epe lyiikwamahooli nomuku ota tu hiya okuume miilonga opo yathike koshigongi shika opo yeye ya mone omalongo noku kundathana ayihe ya pumbiwa kombinga yiikwamahooli nomuku,’’ ta i ndile ngaaka. Momushangwa gwa pitithwa kuIpinge, okwa totha mo wo kutya otaku ka kundathanwa egameno, onkalo oshowo omauwanawa goshilongo Namibia kombinga yiikwamahooli nomuku. Ta ti, mekwatelokomeho lyoNamibian Association for Offshore Oil and Gas Service Providers (NAOGSP), oshigongi shoka otashi ka patulula omandhilandhilo goyendji nokuyakumagindha nashoka shoka shili mondjila uuna tashiya kiikwamahooli nomuku.

“Oshigongi shika shomasiku gaali otashi ka gandja wo omalongo ga yooloka okuza kaaleli ya yooloka mboka taya katulilathanamo omayele okuza kiilonga ngaashi Namibia, Angola, Brazil, Ghana, Nigeria, Norway, oshowo iilongo yilwe hayi ndulike iikwamagadhi nomku,” omushangwa gwa lesha ngaaka.

Iipinge okwa ti esiku ndyoka otali ka tameka noshiindingili okudhimbulukwa esiku lyaniilonga muuyuni ndyoka hali ndhimbulukiwa omumvo kehe mesiku lyotango lyaMei.

Ta ti, esiku ndyoka ya hogolola otali ka opalela esiku lyaniilonga oshoka otaya ka fotokononamo esimano nomayakulo gaanilonga.

“Egameno, omayihumbato oshowo omayakulo oyo yimwe omahangano yina okukala tayi thindi omuthindo noku kwashilipaleka kutya otayi gwanithwa po, opo wo iilonga yi gwanithwa po sha ikwatelela komilandu dha tulwa po,” ta ti ngaaka.

Iipinge okwa ti, esiku ndyoka halyo lyoku ethiwa, oshoka olyuudha omauwanawa gomauyelele ogendji okuza kaapopyoki yiikwamahooli nomku.

– vkaapanda@nepc.com.na