Iitopolwa yomonooli oya londodhwa yi kale ya ilongekidhila ekuthikuthi etiyali lyefundja ndyoka tali popiwa lya thika nale moshilongo.
Minista guunamapya omeya niikwamavi Calle Schlettwein okwa kumagidha aakalimo ye li popepi niishana ya kale ya kotokele ekuthikuthi etiyali ndyoka lyi li mondjila.
“Ekuthikuthi ndyoka otali vulu okukala lyi vule ndyoka lya za ko nale, omolwomvula ndjoka tayi tsikile okuloka meni lyaAngola,” ta popi ngaaka. Omunawino gwomeya omukuluntu muuministeli wuunamapya, omeya niikwamavi Leonard Hango okwa ti ekuthikuthi ndyoka etiyali otali ka thika moshitopolwa shaShana omasiku ngaka.
“Omvula onkene tayi tsikile okuloka moAngola, shoka tashi gwedhelitha omeya gefundja. Nonando moNamibia namo otamu lokwa, hangaashi omvula ndjoka yi li koAngola,” ta popi ngaaka.
Hango okwa popi kutya omeya oga nika oshiponga onkene oshigwana oshina okukala uupathi ethimbo alihe sho osho shoka taya longo nuundhiginini okukondolola efundja oku tseyithila noku kwashilipaleka oshigwana.
Ta ti efundja olya thikile moshitopolwa shaShana oshiwike sha pita, ihe sigo oompaka inaku lopotwa lya yonagula sha ka lkele komeya gomvula ngoka ga yi momagumbo gaakalimo yomOshakati. “Oshana osha ilongekidhila kehe shoka tashi holoka, oshowo okuyambidhidha mpoka tapu ka yonagulwa kefundja,” ta ti ngaaka. Kundana okwa li u uvu omapopyo okuza moshigwana nkene tashi popi kombinga yefundja, nonando pe na yamwe mboka ye na uutile. Omukulupe gwomomukunda Omeege Saima Shikalepo okwa ti, ndika kalyi shi efundja natango. “Ngele otaku popiwa ku na efundja nuumvo, shapo opo talyi ya. Efundja lyoshito ihali kalitha ndje megumbo, ohandi tembuka, nonando ndi li pomulondo,” ta hokolola ngaaka.
Ta gwedhwa po ta ti, aaleli oshowo aanongononi yomeya oye na ontseyo kutya omeya gefundja outage ya ogendji, naya kale ya ilongekidha okuyanda omaupyakadhi haga holoka pethimbo ndyoka.
Ta ti oshigwana ohashi kanitha omaliko gawo, aantu ohaya kanitha oomwenyo dhawo.
Efundja lyotango lya ponokele Namibia iiwike ya piti olya tembudha aantu momagumbo nokupatitha oosikola dhimwe moshitopolwa shaHangwena. Aakalimo oyendji oya tembudhwa, ya falwa komahala kaku na omeya gefundja noya mono omayambidhidho okuza kepangelo. – vkaapanda@nepc.com.na