OSHAKATI-Oshigwana otashi indile kuhulithwe po uudhano woongonyo pokati kaapyokokingonyo naakwashigwana.

Konima yuudhano woongonyo pokati kaPaulus ‘Ninja’ Shimweefeleni naHedison ‘Bulelo’ Nghipondoka wa huulile na Ninja   a taambelwa moshipangelo, oshigwana okupitila komalungula osha kala nokunyenyeta oshowo okupula ehangano hali  longekindha omaudhano kuhulithwepo uudhano woongonyo pokati kaapyokokingonyo naakwashigwana.

Omupopiliko gomaudhano goongonyo ga li pokati kaNinja naBulelo, Jackson Da Silva okwa ti, Nindja okwali a taambelwa moshipangelo shopaumwene Ongwediva Medi Park konima yolugodhi lwawo, Olyomakaya lwa dhanena kEkamuti Lodge kOndangwa.

“Nonando Ninja a sindana uudhano mboka, okwa taambelwa moshipangelo molwuuwehame woongonyo,”ta ti ngaaka.

Omutseyiveta Kadhila Amoomo, okwa shanga kepandja lye lyomalungula kutya, ehangano hali longekindha omaudhano goongonyo nali kale hali sile oshimpwiyu aadhaningonyo.

“Osho shili uudhano woongonyo ohau nyanyudha, ihe natango otu na oku kala tu yali monima. Aadhani inaya kala haya kuthako uudhano mboka unene etaya geye ndele
taya iheyameke,” a shanga ngaaka.

Amoomo okwa ti  shoka otashi vulu okuya tulitha muupyakandhi, etaya pewa egeelo.

Ta pula kutya eyooloko lyomindjundo pokati kaNinja na Bulelo olyi li ngiini?

Omudhaningonyo Samuel Shino okwa ti, omaudhano geli ngaaka, ohaga kala shili goku nyanyudha, ashike, itega yambindhindha.

“Opena eyooloko pokati komudhaningonyo omupopyoki, nomukwashigwana. Oshoka ngoka a popyoka okushi nkene ena okuumba oongonyo opo alulumike, omanga ngwiyaka ota umbu ashike mombepo nelalakano lyoku dhenga,” ta popi ngaaka.

Ta ti, otashi kala shili pauyuuki ngele aadhaningonyo aapyokoki ya taalelatahana.

– vkaapanda@nepc.com.na