Ethimbo lyomatango omanene moNamibia olya konekwa hali faalele oomwenyo dhoyendji okupitila miiponga yomoondjila. 

Onkene ehangano lyoMotor Vehicle Accidents Fund (MVA), okupitila moshikonga shokukelela iiponga yomoondjila shoNational Road Safety Campaign 2025, opamwe nopolisi yaNamibia oya gandja omakumagidho opo oshigwana shi kotoke ko ku kelelwe iiponga pethimbo ndyoka. 

Oshikonga shoka osha nuninwa oshilongo ashihe nosha patululwa pambelewa mehuliloshiwike. 

Osha tameke momasiku 20 gaNovomba notashi ka hula momasiku 16 gaJanuali omumvo ta guya. 

Minista gwiilonga niiyenditho Veiko Nekundi okwa kumagidha oshigwana ta ti, mboka taya ka talela po aakwanezimo yawo kiitopolwa ya yooloka,naya longithe nawa omandhindhiliko gomoondjila okuyanda iiponga hayi holoka unene pethimbo ndyoka lyokili nomumvo omupe.“Otwa hala ethimbo ndyoka lyi kale lyaa na iiponga yasha, onkene otatu kumagidha aahingi yiihauto ya simaneke omandhindhiliko osho wo ya hinge nuukeka,” Nekundi ta kumagidha ngaaka. 

Ehangano lyo-MVA olya ti, okuhinga nuukeka osho wo nethimbo olyo etokolo lyomondjila osho wo onkalo yokuyanda iiponga moondjila. 

Taya ti, uuna oshiponga sha holoka mondjila dhenga konomola yopolisi 10111 nenge MVA 9682 ndyoka itayi pula oshimaliwa kongodhi. 

Natango opolisi miitopolwa yilwe yokonooli oya ti oyi ilongekidha okulwitha iimbuluma mbyoka hayi indjipala ethimbo lyomatango omanene, oshoka iitopolwa mbyoka ohayi kala yu udha. Oya kumagidha oshigwana shi kale sha kotoka, oshoka ethimbo ndika aafuthi oya tegamena okuteya omagumbo omanga ooyene ya ka talela po kiitopolwa yilwe. 

-vkaapanda@nepc.com.na