Ehangano lyokulesha onkalo yombepo olya tengeneke Shiyenga shaNangombe tayi ke ga dhenga nawa pohi momasiku ga taalelwa miitopolwa yokonooli.
Okwa tengenekwa omvula onene, tayi vulu okweetelela efundja.
Omunongononi koshikondo shokutengengeka onkalo yombepo moshilongo Vilho Ndeunyema okwa ti, omvula otayi ka loka nawa momasiku twa taalela miitopolwa yokonooli.
Ndeunyema ta ti, omvula okwa tegelelwa yi ga tilehi nawa, nopu na ompito onene yokweetelela efundja.
“Onkalo otayi ende tayi lunduluka yu uka kuuhwepo, osho wo kuuwanawa lela, ndjoka tayi gandja omukumo gomata,” ta ti ngaaka.
Ta ti, iitopolwa yilwe moshilongo nayo oya tengenekwa tayi ka mona omata, nonando ya kala inaayi lokwa nawa omasiku ga piti.
“Onda lopotelwa natango omata omashona miitopolwa yilwe monooli,” ta popi ngaaka.
Ta kwashilipaleke kutya omvula oyi na okuloka natango, onkene aanafaalama naya kale ye na omukumo.
Okuza mehuliloshiwike, omvula oya loko nawa koshitopolwa shaMusati, kombinga yokoongamba.
“Omikunda dhimwe moshitopolwa shaMusati, odha mona omata gomvula nonando hago ngaa ngoka taga hokitha. Oshitopolwa shaHangwena osha tegelela okumona omata gomvula ogendji oshiwike shika,” ta fatulula ngaaka.
Ta ti, omata natango oga dhenge ngaa kiitopolwa yilwe kuununginino woshilongo.
Omunafaalama Feneste Amutenya gwomomukunda Onanime okwiindile aanafaalama aakwawo yomomapya ya yande okukala pookamba pethimbo ndika lyokulonga momapya.
Okwa popi kutya okwa koneke aantu oyendji taya dhenge ashike omangandja omanga ye na okutameka okulonga momapya ya longe iipalutha yawo, omanga omvula tayi loko nawa.
Amutenya okwiindile aaleli yopamuthigululwakalo opo ya tule miilonga ompango ndjoka tayi thiminike oondingosho dhi kale dha pata pethimbo lyongula uuna aakwashigwana ye na okukala ye li momapya.
Thomas Ashipala ngoka a hokolola kutya okwa simaneka iilonga yomepya naye okwa indile epangelo lyi shunithe oondando dhomauhoho pevi opo aakwashigwana ayehe ya vule okwiilandela omauhoho yo yi ilikolele iipalutha ya gwana okuza momapya gawo.
“Ngele atuhe otu na omukumo nelandulathano miilonga yetu, otatu vulu okulonga sha gwana oku tu palutha noku kandula po ondjala. Ta ti, otaya vulu okuhuma komeho ngele taya longitha ethimbo miinima yongushu nopethimbo lyoopala.
-vkaapanda@nepc.com.na