Kansela gwoshikandjo shUuvudhiya moshitopolwa shaShanaTimoteus Shivute ota kumagidha oshigwana oshowo aanafalama ya kwate nawa omililo opo ku yandwe epeya.
Shivute shika okwe shi popi moku tala onkalo yoshikukuta ndjoka ya hanya noonkondo, noshi topolwa she shoka hashi hupitha iimuna hayi zi kiikandjohogololo oyindji mOshana, oshowo kOhangwena Omusati nOshikoto osho ishewe hashi kala iiningwanima yepeya olundji.
Ta ti, kehe gumwe okwa mona nkene omuloka gwa ningi po nuumvo, onkene omwiindhi nagu kwatwe nawa, okuyanda embugaleko, ondjala ya yaga kesipa, ekanitho lyoomwenyo oshowo ehanagulepo lyiinima yongushu.
“Iiwike iiyali ya piti okombuga okwa pi ohauto, ndyoka ya pi po thiluthilu.
Omulilo ngoka ogwa taandele nombuga, elago enene inamu kanithila omuntu omwenyo,” ta po pi ngaaka.
Ta gwedha po ta ti, omumvo gumwe gwa piti, omulilo gwepeya ogwali gwa faalele oomwenyo dhantu yaali noku ehameka yatu.
Shivute okwa kumagidha oshigwana shi kwate omulilo nuukeka, opo omililo dholudhi ndoka, handhi holoka okuza pethimbo ndika, kaadhi holoke.
“Oshigwana nashi kale sha ndhindhilika kutya omulilo ohagu taandelekwa kombepo, onkene nashi kale tashi kondolola omililo uuna tashi tema okukwashilipaleka kutya omulilo ogwa dhima thiluthilu,” ta kumagidha ngaaka.
Ta ti, okukeelela okuvule okupanga, onkene ngele shika osha keelelwa itashi holoka.
“Omulilo ogu na okukondololwa opo kaagu holoke, shika nashi tameke na kehe gumwe. Oshigwana nashi kunkule omwiidhi pooha dhomagumbo oshowo kehe pehala omulilo tagu vulu oku andjakana gu e te epeya,” ta popi ngaaka.
Omugandji gwomauyelele muuministeli womindhingoloko Romeo Muyunda okwa ti, ndika olyo ethimbo epeya ha li mbugaleke omakuti oshowo okuhanagula noku faalela oomwenyo dhaantu, onkene oshigwana otashi kumagidhwa shi kale sha kotoka ethimbo kehe.
Ta ti, nonando omililo ndhoka dha holoka inadhi shiwika natango mpoka dha zi, oshigwana otashi kunkulilwa shi kale aluhe tashi kwata nawa iinima hayi tema omulilo, okuyanda uupyakandhi wolundhi ndoka.
Omulumentu gumwe ngoka a talele po ombuga oshiwike sha ziko okwa ti, ohauto ye oyili mongalashe yali ya yaka omulilo.
“Otaku tengenekwa kutya omulilo ogwa e twa komwiindhi gwa kakatela kohi yohauto, sho ohauto ya mono omweenye,” ta gwedha po ngaaka.
vkaapanda@nepc.com.na