Opolisi moshitopolwa shaShana oya indile oshigwana opo shi gandje oondjembo ndhoka inaashi hala we nenge kaadhi na oombapila kopolisi, no itapu ka kala nando omapulapulo gasha. Omupopiliko gopolisi moshitopolwa shaShana Thomas Aiyambo okwa ti, egandjo lyoondjembo olya tameka nale notali ka hula momasiku 31 gaSepetemba nuumvo.
“Ndjika ompito ya pewa oshigwana oshali shamuhongi, onkene oshigwana otashi kumagidhwa opo shi longithe ompito ndjika,’’ ta kumagidha ngaaka. Aiyambo okwa ti, itapu ka kala nando omapulapulo gasha. Ta ti, itapu ka pulwa kutya ondjembo oya zi peni, nongele oyi na oombapila, shoka itashi ka ningwa. “Kehe ngoka e na ondjembo, kutya okwa li e yi toola, nenge okwa kala nayo ethimbo ihe ke na shoka te yi longitha ne yi gandje miikaha yopolisi,’’ ta ti ngaaka.
Ta ti, oondjembo ndhoka otadhi falwa koosasiona dhopolisi mOshakati, Ongwediva oshowo mOndangwa. “Inamu kala mu na uumbanda washa, ndjika ompito ya gandjwa kaakwashigwana okuza kepangelo, onkene yi longitheni,” ta ti ngaaka. Aiyambo okwa shilipaleke lwahugunina kutya kehe ngoka taka gandja oondjembo ke na sho ta ningwa.
Ta ti shika kashi shi oshikando shotango oshinima shika tashi ningwa. Omasiku owala omashona ga piti, Commissioner Josia Shikongo ngoka e li omukuluntu gwoshikondo shopolisi shi lile po etalonawa lyoondjembo moshilongo, okwa li a kumagidha oshigwana kutya kehe ngoka a hala okugandja oondjembo kaadhi na oombapila nenge inee dhi hala nenge iikuti, ihe oku na uumbanda, otaya vulu okupitila kaakuluntu yosasiona, itapu kala omapulo gasha.
Otaku hokololwa kutya omumvo gwa yi Aanamibia okwa li ya gandja oondjembo inaaye dhi hala dhi li 570 oshowo iikutu yi li 24 334. Okwa tothwa mo kutya oondjembo niikuti yilwe oya li ya hanagulwa po omolwomatompelo gontumba.
Otaku hokololwa kutya oondjembo odhindji okwa li dha zi koshitopolwa shaMusati, taku landula oshitopolwa shaKhomas.
vkaapanda@nepc.com.na