Victoria Kaapanda
Nonando uuministeli wuuhaku nonkalonawa wa kala nokukumagidha oshigwana kombinga yokutuntilwa okukelela nokushonopaleka ompito yokukwatwa komukithi goCovid-19, oshigwana osha gandja omakemo gasho.
Linea Shikukutu gomOshakati okwa ti okutuntilwa hako uupyakadhi, ihe uumbanda otwe u etelwa kwaamboka ya tuntilwa, sho ya li ya mono omandhindhiliko ga yooloka.
“Aanegumbo yandje ye li yatatu oya tuntilwa, ihe ayehe inaya ka mana ko we omalweetho agehe, oshoka oya ka mona omandhindhiliko ge ya tilitha konima ya tuntilwa,” ta hokolola ngaaka.
Ta ti, gumwe okwa li a tameke okuehama omutse, itaagu polo, ihe ina kala nale ha ehama omutse.
Gumwe okwa li a tameke oku uva uutalala omanga gumwe a li a kanitha oonkondo molutu.
“Oshike omauwehame ngoka ga li ga tameke ashike konima ya tuntilwa,” ta pula ngaaka. Ta gwedha po ta ti, oya kala nokupewa omalongo okuza kaanambelewa yokuuministeli wuuhaku, ihe sigo onena natango oku na omapulo ogendji ge mu limbililika. Immanuel Thobias, ota pula kutya oshike okutuntilwa ku na ‘okuthiminikilwa’ aantu? “Otwa li twa thiminikilwa okutuntilwa miilonga yetu, oshoka otwa lombwelwa kutya ngoka inaa tuntilwa itaka tsikila iilonga,” ta popi ngaaka.
Tobias ngoka ha longo komatungo mOngwediva okwa ti, nuumvo oya lalekwa miilonga, kaape na etompelo lyasha omanga ya tuntilwa nale omumvo gwa yi. “Tse inatu tuntilwa osho twa hala, ihe otwa tuntilwa oshoka okwa li twa hala okukaleka po iilonga yetu, ihe nena otwa tidhwa ,” ta nyenyeta.
Ta ti, ngeno okwa li ya tseyithilwa petameko kutya otaya ka lalekwa miilonga ngeno inaya tuntilwa.
“Otu uvite twa fa twa kengelelwa oshoka inaye tu lombwela oshili, tse katu shi ngele nayo oya tuntilwa,” ta ti ngaaka.
Gumwe okwa popi kutya, oyendji otaya ti, oshigwana osha kala hashi tuntilwa okuza nale, ihe kakwa li shi shi kutya otashi tuntilwa nomiti dholudhi luni, osho ihe natango oya ndopa.
“Omiti ndhoka dhonale kakwa li dhi na omandhindhiliko taga limbililike konima yotuntila, ihe ndjika yoCovid-19 oyi na,” ta popi ngaaka.
Selma Nashidengo gomOngwediva okwa ti otuntila kayi na uupyakadhi nando. ”Onda mana ko omalweetho gandje agehe, ihe sigo oompaka inandi mona uupyakadhi washa,” ta ti ngaaka.
Simon Simeon gomolukanda Evululuko okwa ti, oshigwana otashi kundathana nokwiitulila mo omayele ga puka, ta ti okutuntilwa kaku na nando uupyakadhi.
“Onda tuntilwa nda mana ko omalweetho agehe, ihe okwa li nda tutswa ee tandi monika ndi na ocorona, ihe kakwa li nda uvu uuwehame washa. Shoka tashi ulike kutya omuti ngoka ogwa kwathela ndje,” ta popi ngaaka.
– vkaapanda@nepc.com.na