Ohamba yoshitunda shOukwanyama oya ulika Ndemudina Nghifikepunya Ndove a ninge elenga lakula loshikandjo shaHakafiya.
Ndove okwa ulikwa Olomakaya nota ka nangekwa pambelewa momwedi tau ya.
Oshikandjo Ohakafiya osha nyumunwa po konima yeedula 10, oshinima osho sha li sha eta eenamanana noku he na mbili noshiwana oule wefimbo lile. Ombelewa yohamba yaUkwanyama oye shi pondola okukala ya kandula po oupyakadi weenhamanana odo kwa li ndi li moshikandjo shaHakafiya konima eshi kwa li oshiwana sha handuka shaashi oshikandjo shavo shakufwa po.
Omundo 2010 elelo laUkwanyama okwa li la kufa po oshikandjo Ohakafiya eshi kwa li sha topolwa moikandjo ivali Oshikunde nEenhana. Onghee okwa ti okudja opo eshi okwa li sha eta ovakalimo va dja momikunda dili moshikandjo shaHakafiya va kale va handuka nova kale alushe tava pula opo oshikandjo shavo shi aluke.
Moshipopiwa shaye omunashipundi welelo laUkwanyama Eliase Waandja okwa kumaida oshiwana shomushikandjo Hakafiya opo shi kale shina ombili nokukala tashi longele kumwe nelenga lavo.
“Xulife po okukala ta mu kondjela omadu noshoyo okukondjela oipundi yokulela omukikunda noikandjo,” Waandja ta ti.
Okwa ti elelo laUkwanyama ota li twikile nokukaleka po ombili moshiwana noshoyo okukandula po eenamanana momikunda. “Oshiwana osha kala shi li momikunda davo shi na oumapyakadi a yooloka ashike ka kwa li shi hole oku ya koshikandjo shaShikunde opo shi ka konge omakwafo, eshi ovakwashiwana va anya kutya itava i ko manga va kufwa oshikandjo shavo,” Waandja ta hokolola.
Okwa yelifa ta ti ovakwashiwana ova kala efimbo lile ina va mona omayakulo oo a yandjwa kelelo laUkwanyama shaashi okwa li va kufa etokolo kutya itava i ko kumwene woshikandjo shaShikunde oku kwa li kwa tulwa oshikandjo shavo.
fhamalwa@nepc.com.na