OMUNTELE – Oshikondo shuundjolowele nomayakulo goshigwana moshitopolwahogololo shaShikoto osha ti osha hala okuyambula po onkalo yuundjolowele moshitopolwa. Omukuluntu gwoshikondo shoka Joshua Nghipangelwa okwa lombwele oshikundaneki shoNampa mEtitatu kutya ngashiingeyi otaya pekaapeka onkalo ya mone kutya ookilinika ngapi dha pumbwa omayambidhidho. Nghipangelwa okwa ti omapekaapeko oga pumbwa okuningwa tango omanga inaaku ningwa olukongo lwoshimaliwa.
“Oshikondo shika oshi na omashongo ogendji ngaashi uupangelo wa pumbwa okoopalekwa, onkalo yokwaa na omeya puupangelona osho wo eshongo lyonkalo yoopate puupangelo wontumba,” Nghipangelwa ta ti ngaaka.Okwa popi kondandalunde kutya onkalo yomeya kokilinika yaHedimbi itayi opalele aantu, onkene ohaya fala ko omeya kehe oshiwike.
“Ondjila yokuya kokapangelo kOlupaka ombwiinayi nohashi tu pula konyala oowili hamano okuthika hoka, ashike ohashi tu pe uudhigu pethimbo lyewulumompumbwe,” ta fatulula ngaaka.
Okwa ti wo oye na omeya ge na uukwatya mboka hawu yonagula oopaipi dhomeya moshikandjohogololo shaTsumeb. Okakilinika okakulukulu kokOmuntele, hoka ka kala monkalo tayi togo meho, oka opalekwa muMaalitsa.
“Okakilinika hoka oka kala po uule woomvula dha konda 32 notwe ka opaleke oshoka kaka li ke li monkalo ombwaanawa kaapangi osho wo kaanuumvu,” ta ti ngaaka.
-Nampa