Oshimaliwa shi vule poomilliona N$24 osha longithwa okweeta po oomboola dhomeya moshitopolwa shaShikoto, nelalakano lyokukandula po omaupyakadhi gomeya osho wo okunkondopaleka eyandjaneko lyomeya.

Oomboola ndhoka odha tulwa komikunda Akazulu, Onelago, Otatashe osho wo Oshikondeilwa hoka kwa kala unene uupyakadhi wokwaa na omeya.

Oshiindingili shoka osha li sha tula pamwe aakuluntuwiliki yomahangano osho wo yuuministeli ngaashi omukuluntu gwehangano lyokwaandjaneka omeya Abraham Nehemia, omukuluntu muuministeli wuunamapya, omeya osho wo etalululo lyevi Teofilus Nghitila mboka ya li ya longele kumwe okweeta po oomboola dhoka. Nehemia okwa popi ta ti, ayihe mbyoka oya longwa omolweyitulemo nuudhiginini osho wo elongelokumwe lyehangano lyawo osho wo epangelo lyaNamibia.

“Oshitopolwa shaShikoto osha kala sha taalela uupakadhi womeya momindhingoloko dha yooloka, ihe otwa kala wo tatu longo nuudhiginini okukwashilipaleka kutya omeya oga andjanekwa moshigwana,” ta ti ngaaka. Kathindi okwa ti oomboola dhomeya ndhoka otadhi ka kwathela aantu oyendji momikunda moka mwa kwatelwa iimuna.

Ta ti, mboka ya tula po oomboola noku dhi opaleka natango oya gandja omadhewulo kaakalimo ye dhi kaleke po.

“Shika otashi holola ashike kutya epangelo otali longo nuudhiginini okulongela oshigwana omauwanawa,’’ ta popi ngaaka.

Aanamukunda oya li ya pandula epangelo sho lye ya pe oomboola, oshoka oya kala ethimbo ya taalela upyakadhi womeya, taya ti, omeya omwenyo.

-vkaapanda@nepc.com.na