Aapolisi mOshikuku mboka ya ningi ethimbo taya longele motenda, oya mono ositasi ompe, ndjoka ya patululwa pambelewa Etine lya ziko.
Oositasi ndjoka ya tamekele okutungwa mo2016, oya li yapu okutungwa mo2020 Desemba.
Oya tungwa noshimaliwa shongushu shi vulithe thike poomiliona N$79, 6, noya kwatela omagumbo gaapolisi oshowo iiyenditho.
Omukuluntu gwopolisi moshilongo Sebastian Haitota Ndeitunga okwa ti, aapolisi mboka ya kala taya longo okuza me hala ekulu, aaidhidhimiki.
“Yamwe oya kala haya hingi oondjila oonde, okuza kiitopolwa yimwe ta ye ya oku longa kOshikuku, oshoka ka puna omagumbo go kuza,” ta ti ngaaka.
Ta ti, ositasi ndjika onene, oya tungilwa omahala gwondjedhililo, nonando mOshikuku ihamu holoka iiningwanuma iiwinawi olwindji.
“Olundji aafuthi ohaya zi kiitopolwa yilwe ta yeya okulonga omiyonena kOshikuku. Oyendji otaya lopotwa taya zi komalukanda koShakati, ngaashi Ankambya nOshoopala. Onda hala ondjeedhililo ndjika yi kale ya yela ngaashi ya tungwa po, kaayina nando omufuthi gumwe,”a popi ngaaka.
Omukalimo gwomOshikuku Leonard Daniel okwa ti, oya nyanyukwa sho epangelo lyeya dhimbulukwa.
“Paife otu uvite kutya otuna ositaasi yopolisi, nonando ota tu lopota oshiningwanima sho ntumba, otuna ngaa omukumo kutya ota tu vulu okukwathelwa, nale okwa li hatu lombwelwa kutya ka pena iiyenditho,” Daniel ta ti ngaaka.
Ta ti, paife oyu uvite kutya oye li megamena. Daniel ta gwedha po ta ti, etungo lyawo ewanawa, shoka tashi ulike woo ethano kutya ondoolopa yawo yaShikuku otayi humukomeho.
Oositasi yaShikuku oyi na omahooli giihauto meni.