Ondoolopa yaShikuku oya tula miilonga etokolo lyokuninga omangeshefelo kehe Etitatu koshiwike, opo aashingithi ya yolooka ya mone ompito yokulanditha.
Omugandji gomauyelele melelo lyondoolopa lyaShikuku John Siloiso okwa ti, shoka oye shi ningi ya landula moompandhi dhelelo lyondoolopa lyaShakati.
Aakalimo yomOshakati oya pewa omasiku gaali moshiwike okulanditha iinima yawo okuza kiikulya sigo okiikutu.
Aantu mboka mOshakati ohaya landitha Omaandaaha nEtitano, haya landithile kondje yomatala.
“Etokolo ndika okwa li lya tulwa miilonga okuza omumvo gwa yi. Nando shoka sha tokolwa, opo tatu kundathana opo tu kale tatu gandja omasiku gaali moshiwike, shika etameko ashike,’’ ta ti ngaaka.
Siloiso ta ti, ompito ndjoka oya nuninwa aakalimo ayehe, unene mboka kaaye na omahala momatala oshowo mboka kaaye na oompito dhokushingithila.
Ta gwedha po ta ti, ndjika otayi ka kala ompito ombwaanawa kaakalimo mboka haya ka landa noku ka laditha iinima yawo kOshakati Etitano nOmaandaha.
“Omahala otaga kala taga pula ombiliha lela, opo kehe gumwe a vule okumona ehala lye. Ta ti otaya ka pula ashike N$10 mehala lyiikutu oshowoN$20 momahala galwe mesiku.” ta ti ngaka.
Ta ti, mesiku oya hala ashike aantu ye li 100.
Ehala ndyoka tali kaningilwa iipindi ota li kala tali talika ko onge ehala lyo malandithilo mpoka aanangeshefa taya kala taya gongala okuiyambula po noku itulilamo omayele nkene yena oku shingitha, iipindi ya wo.
Enene dhiladhilo ndyoka olya li lya etwapo kaakalimo no lya li lya tambwaako.
“Elalakano lyomawuliko giipindi gesiku limwe oku gandja ompito kaanangeshefa aashona opo ya ulike noku shingitha iipindi ya wo kookasitoma dha inekelwa oku thika siku ndyoka me hala limwe,’’ ta popi ngaaka.
Ta ti, ohashi gandja ompito kaakwashigwana okulanda iinima ya kala noku yi konga moositola dhomomudhingoloko ihe kaye yi wete.
“Omawuliko giipindi ngoka oga nuninwa aanangeshefa oku ya pamwe noku topolelathana omadhiladhilo go mangeshefelo.
Pamukalo gu li ngaaka, otaya tungathana nokuyambulathanapo”, Siloiso ta ti ngaaka.
vkaapanda@nepc.com.na