Aakalimo ye li 200 okwa lopotwa ya thigwa powala sho omagumbo gawo ga teywa po kombepo yoshikungulu omutenya gwEtiyali koAranos moshitopolwa shaHardap. 

Sha ikolelela kuuyelele wa pitithwa kuuministeli womauyelele moshitopolwa shaHardap, ombepo yoshikungulu ndjoka oya teya po omagumbo ga adha 70, sho ya gwitha ko iipeleki nokuhalakanitha omalusheno osho wo omatungo. 

Oya shanga kutya aakalimo ye li 200 oya tembudhwa, ya pewa omalukalwa gopakathimbo omanga taku ningwa omapekapeko osho wo omatokolo gaashoka shi na okuningwa po. 

Otaku hokololwa kutya okwa monika ashike iiponga iishona, ihe aantu oya mono uuhaku kiipangelo. 

Oombelewa oonene dhopashitopolwa dhoHardap odha tumu aanambelewa ye na sha niiningwanima yombaadhilila okuninga omapekapeko. 

Uuministeli owa shanga kutya ombepo oya tameke omanga omvula inaayi loka, ndjoka ya tengenekwa ya loko oomilimeta 30. 

Ombelewa yomuprimaminista oshiwike sha zi ko oya li wo ya pititha omushangwa kutya oshigwana nashi kale sha ilongekidhila oshikungulu, omolwomvula onene ya tengenekwa tayi ka kala ko nuumvo. 

Oya ti wo, ope na ompito onene yokukanitha oomwenyo dhaantu, iimuna neteyagulepo lyomatungo, onkene oshigwana nashi kale sha ilongekidha. 

Oshiwike sha zi ko Shiyenga ShaNangombe okwa li e ga dhenge pevi konooli moshitopolwa shaShana. 

Sha ikwatelela kepandja lyokomalungula lyonkalo yombepo, omvula oya ndhindhilikwa ya loko wo moshilandopangelo oshiwike sha zi ko. Natango oshitopolwa shaHangwena na sho osha lopotwa sha mono omata. 

Omata ngoka ga dhenge pevi koondolopa dhoka dho konooli oga gandja omukumo kaanafaalama yomomapya osho wo yiimuna, kutya nuumvo oku na omuloka omwaanawa. 

-vkaapanda@nepc.com.na