Minista gwomawudhano, aanyasha nomawanawa Agnes Tjongarero a popi ta ti, okufawula kiilonga Etitano nOmaandaha, otashi ulike uukwatya womuntu miilonga unene maanyasha.
Minista dhoka okwedhi popi Etitano lya zi ko sho kwa li takumagidha aanyasha ya itulemo miilonga ya wo pepatululo lyoshikunino, momukunda Onkuni moshitopolwa shaShana.
Ta ti, oshikunino shoka otashi kadhewula aanyashaa ye li 84 yomOshana, oku gandja ompito yiilonga moshitopolwa moka.
“Ngele omuntu ihathiki kiilonga Omaandaha oshowo Etitano, opena ashike omatempolo gaali, ta ilongekidhile Etitano lye okukanwa omalovu nenge ali tanu omalovu Osoondaha. Tuleni iilonga yeni komeho ga kehe shimwe,” Tjongarero a popi ngaaka.
Ta ti, aanyasha otaya nyenyeta kutya kayena iilonga shi li, ihe epangelo otali kondjo okuya tsakaneke ondjila kati, ihe itaya itulamo miilonga yawo ngaashi nana oopoloyeka dhika.
Oopoloyeka dhika odha patululwa miitopolwa ayihe 14 oshilongo ashihe, nonando iikunwa miikunino inayi fathana.
“Oshikunino shoka sha patululwa momukunda Onkuni otashi ka dhewula kehe ngoka ena ehalo lyokutseya opo woo akatameke oshikunino, ye natango akagandje iilonga kaanyasha akwawo,” Minista a popi ngaaka.
Oomiliona 15 odha topolelwa iitopolwa ayihe 14 oshilonga ashihe okukwathela aanyasha ya dhewulilwe iilonga yunamapya okumona ontseyo ya kaninge oopoloyeka dhawo yo yene.
Oshikununo shoka oshina aanyasha ye li yahamano pethimbo ndika, nongele yamana okudewulwa, ota mukeya ya kwawo, opo ya dhewulwe natango oku za moshitopolwa ashihe shoShana.
Paulina Samuel okwa ti, moshikunino shawo oya kunamo iikwamboga ya yooloka ngaashi, spinach, omatama, green paper, omboga, oonyanga oshowo okanona kamundesha.
Ta ti, oyo aanelago oshoka oyo yatothwamo ya tameke okudhewulwa. “ Ota tu kalongitha ompito ndjika twa pewa. Otashi kala oshinakugwanitho shetu kutya oshikunino shika itashi kandopa oku etapo shoka shanuninwa,” Samuel a popi ngaaka.
Oopoloyeka dhika odha yambidhidhwa noshimaliwa sha zi kepangelo, sha gandjwa kehangano lyongundu yaanyasha moshilongo tali ithanwa National youth council “NYC”.