OUTAPI Iilonga pEndiki lyEzulonkalo lyOpaungomba pOnakayale oya kala mompumbwe yoshimaliwa, shoka sha etitha ooprojeka dhimwe pendiki ndika dhi kalekwe manga. Omukuluntu gOsenda ndjika, Thomas Shaanika dhika okwe dhi thikitha momakutsi gOmupresidende Hifikepunye Pohamba ngoka a li metalelopo pendiki pethimbo lyosheendo she miitopolwa itatu pondingandinga yuumbangalantu; Oshana, Omusati nOshikoto. Shaanika ota ti endiki olya palamenwa komaupyakadhi ogendji ngoka taga shunitha monima iilonga yalyo yesiku kehe, nokwiindile epangelo li ya yugulule monkalo moka ye li opo osenda ndjika yi vule okugwanitha po oshimpwiyu shayo okuyamukula kiihuna noompumbwe dhaantu mboka taya lumbu nuulema. Onkalo otaku tiwa oya nayipala unene konima yoomvula ndatu, sho osenda ya kala ihaa yi mono we omauwanawa okuza miipambuliko yayo mOkampani Etale Fishing. Yimwe yomooprojeka dha simana ndjoka ya hulila moompa oyo osikola yomadheulo, ndjoka etungo lyayo kwa li lya tamekwa omimvo dhontumba dha pita po, kakele epangelo olye shi pondola ashike okumanitha ondondo yotango yetungo lyoprojeka ndjika ano okutunga ashike ombelewa oshowo oongulu dhooklasa. Okuza nkene oshitopolwa shezulonkalo sha kuthilwe ko kUuministeli wOmavi nOmatulululo nokukogekwa kUuministeli wUundjolowele nIilonga yOnkalonawa oko ku ninge haku ya zile oonzo dhopashimaliwa dhondondo ontiyali, oprojeka ndjoka oya hulithwa po. Shaanika ta yelitha kutya ngele oprojeka ndjika oya manithwa, otayi ka vula okukwatha aantu oyendji taya lumbu nuulema mboka ngashingeyi taya mono iihuna, oshoka oyendji yomuyo inaye shi pondola okumona iilonga. Etungo lyomandiki ga faathana miitopolwa yilwe ngaashi moKavango, Kunene, Ohangwena, Oshana, Oshikoto nalyo olya ndopa okuya komeho. Pethimbo ndika, endiki ohali taamba ashike aantu mboka ye na uulema mboka ye na ondondo onti-12, Shaanika ta ti, nokugwedha po kutya osha simana unene opo etaambo ndika lyaantu ye na ondondo yi thike mpoka li talululwe opo mboka wo inaya mana ondondo onti-12 ya vule wo okumona ompito yokutaambwa. Shaanika okwiindile wo omahala nuuklinika wopaunamiti ngaashi oshipangelo shEpangelo shaKamhaku ya kambadhale okushunitha pevi omikweyo omile moka aantu ye na uulema haya kala ethimbo ele uuna taya kongo omayakulo gawo gopaunamiti. Omupresidende Pohamba okwa uvaneke okutala komaupyakadhi ngoka pakuya moonkundathana niikondo nuuministeli wayooloka. Pokati mpoka, Omupresidende Pohamba okwa ka ya moonkundathana dhomiyelo dha tsuwa ekumba pamwe nElenga Enene lyOpamuthiguluwakalo gwaMbalantu, omusamane Oswin Mukulu . Omupresidende okwa li wo a talele po Oprojeka yUuteku wOohi pEpalela, Osikema yOkutekela Iimeno pEtunda omanga ina ka egulula pambelewa Ombelewa yOpashikandjohogololo shaRuacana oshowo ombelewa yUunamapya poRuacana.