OSHAKATI – Ethimbo lyaDesemba aanyasha oyendji ohaya kala ya hala okuulika shoka ya longo momukokomoko gwomumvo, ihe okwa ndhindhilikwa haye shi ulike momukalo inaagu uka.
Anuwa oyendji ohaya dhanene oshimaliwa miikolitha, okutalela po omahala gokokule oshowo okulanda iinima inaaye yi pumbwa, nonando kashi li ehalo lye.
Mboka ya li moonkundathana noshifokundaneki shika mOshakati oya kumagidha yakwawo ya ilonge okulongitha oshimaliwa shawo nawa okuyanda omaupyakadhi goshimaliwa petameko lyomvula.
Oyendji ohaya kala ya taalela uupyakadhi woshimaliwa petameko lyomvula omolwokwaakwata nawa oshimaliwa ethimbo lyokili nomumvo omupe.
Aanyasha ya yooloka yomOshakati oya li wo ya gandja omatompelo nomakumagidho gawo nkene oshigwana shi na okukwata oshimaliwa sha sho pethimbo lyaDesemba.
Sovita Mateus omukalimo gwomOshakati okwa ti omangandja oga kwata ko aanyasha oyendji, ndele kaya gwanitha po we shoka ye na okulonga nenge okuningila aakwanezimo yawo pethimbo ndika.
“Gumwe ota zi kuushimba ihe ota hulile mOshakati nOngwediva, ta landa omalovu gomayovi ihe kegumbo ina thika ko ye ina tuma ko nando osha, otashi ti ngiini? Mongaashingeyi kashi na omukiintu nenge omulumentu, ayehe oya kwatwa ko komalovu,” ta nyenyeta ngaaka.
Sunday Reinhord okwa ti shoka sha tulwa momalovu oshinene, ihe inashi hala okweetha aanyasha nando, ngele owa yi pomahala gomanwino paife opo ye li taya kondjele okulanda omalovu.
“Ngele onda pula omumwandje N$100 ite li pendje, ihe omalovu ota landa, otashi ti ngiini? Pethimbo lyetu tse okwa li hatu fala iikulya komagumbo tango omanga inatu ya molweendo,” ta popi ngaaka.
“Nonando ethimbo ndyoka lyokili olya talika ko ongethimbo lyokugandja, oshigwana nashi ilonge okukwata nawa iimaliwa, nokwiihupithila po,” Reinhord ta kumagidha ngaaka.
Ta ti, ethimbo lyaJanuali olyo hali kala aanona taya yi koosikola osho wo yamwe yu uka kiiputudhilo yopombanda ya yooloka.
Saima Ndikwetepo ngoka ha landitha uukuki komeho goNambango mOshakati, okwa ti Desemba ke shi ehulilo lyuuyuni.
“Oyendji oya tala ko omwedhi ngoka gwa fa inaagu fa oomwedhi oonkwawo, ihe kape na eyooloko. Aguste nago omwedhi gwefudho, ihe aantu ihaya zi mo ye na omaupyakadhi ga fa gomuDesemba,” ta popi ngaaka.
Ta kumagidha ta ti, oshimaliwa nashi longithwe shoka shi na okulongithwa, ihe hakehe shoka to mono she ya komeho goye oshoka anuwa omwenyo nagu pewe shoka tagu pula, pethimbo lyokili.