Lahja Nashuuta

Ehangano lyoRoad Fund Administration (RFA) olya li lya kutha miilonga gumwe gomaanambelewa aakuluntu Scheifert Shigwedha. 

Shigwedha okwa zi miilonga momasiku 30 Kotomba, sha landulwa kwaashono a monika ondjo melongitho nayi nekano lyoshimaliwa shi thike poN$200 000. Kuuyelele wa thiki kuKundana, otaku hokololwa kutya oshimaliwa shika osha li sha nunilwa oku ka kwathele aakwashiwana mbono ya li ya ningi iihakanwa yefundja moshitopolwa shaHangwena momunvo2023. 

Shigwedha okwa li a hokolola kutya omimvo mbali dha ka pita okwa li i inekelelwa oshimaliwa N$600 000 okuza ko-RFA opo e shi gandje noku shi topolela iitopolwahogololo yi li itatu, Oshana, Omusati nosho wo Ohangwena. 

Kuuyelele okuza kehagano ndyoka, kehe oshitopolwa osha li shi na okupewa N$200 000. 

Ta hokolola kutya ekwatho ndika olya li lyi na okupitila moombelewa dhoongoloneya yiitoplwa mbyoka. 

Ta tsikile ko wo kutya momasiku 14 ga Maalitsa 2023, okwa li a gandja oshimaliwa shika pambelewa poshituthi shoka sha li sha ningilwa mOshakati. Shigwedha ta tsikile ko ne kutya, omanga oshimaliwa shOshana kwa li e shi gandja okupitila moombelewa onene dhopashitopolwa, oshimaliwa shokOhangwena okwa li e shi tumine ongeshefa yedhina Ethics Group Holdings. 

Ta hokolola wo kutya shino okwe shi ningi shi ikwatelela kelombwelo ndyono kwa li a pewa komuyambidhidhi ngono kwa li gwangoloneya goshitopolwa. 

Shigwedha ta hokolola wo kutya omuyambidhidhi okwa li e mu tumine oakaunta yongeshefa yoEthics Group Holding oko a tumine oshimaliwa shoka. 

Ta hokolola kutya nonando ehangano lya ulike lya landa iikulya, ha iimaliwaayihe ya li ya longithwa shono sha ka eta ombelewa yoshitopolwa yi tule mo omapekapeko. 

Taku hokololwa wo kutya iikulya owala yoN$60 000 kwa li ya landwa, ihe omukuluntu gwehangano ndyoka Ethics Group Holdings kwa li, okwa li a gandja iikulya yo N$118 000 na okwiilongekindha oku gandja mbyoka ya hupu ko. 

Moonkundathana naKundana,ngono kwa li nale ngoloneya gwaHangwena , Walde Ndevashiya okwa li a tsu omuthindo kutya ombelewa ye kakwa li ya gandja uuthemba opo oshimaliwa shi tulwe koakaunta yoEthics Group Holdings. 

“Ombelewa yandje ihayi longo niimaliwa, olundji ohatu ka konga omakwatho, na kehe ekwatho tatu mono oli na okupitila mombelewa yetu yoombelewa oonene. Omuyambidhidhi gwandje ka li a lombwela ndje sha. Onde ke shi tseya owala sho ombaapila ya zi kombelewa yopashitopolwa no-RFA tayi popi kombinga yoshimaliwa shoka.” Ndevashiya ta hokolola ngaaka. 

-lnashuuta@nepc.com.na