ONGWEDIVA – Ngoloneya woshitukulwa shaHangwena Sebastian Ndeitunga okwa ti ovanhu aveshe ovo va li va holoka koshivilodimbuluko shOmukokolipresidente Sam Nujoma kEenhana kava li tava dulu okupewa ombelela shaashi kaya li ya wana. 

“Sha fimana omwaalu muhapu wovanhu va holoka okuyandja efimaneko lavo kOmukokoli. Ovanhu okwa li ve uya vahapu noshivilodimbuluko okwa li sha longekidwa nawa,” Ngoloneya ta ti. 

Ndeitunga okwa popya onghela pefimbo a li a pulwa kombinga yoshikumungu omo vati ovanhu vamwe va pewa ouyaxa volwishi lihe na mbelela pefimbo loshivilodimbuluko. 

Okapale komaudano kEenhana okwa li ke hadi ndoo ovanhu omayovi va dja koitukulwa ngaashi Oshana nOshikoto nosho yo ovanhu va dja koAngola. Mokati kovalilafya, omwa li yo mwa kwatelwa ovanafikola noonakulwa vakulu ovo va li tava imbi nokutanga xe yoshiwana Nujoma. 

Ndeitunga okwa yelifa ta ti eengobe heyali odo da tomwa okwa li ashike da tengenekelwa ovanhu 16 000 ashike koshividimbuluko okwa holoka ovanhu tave lishilile po40 000. 

“Oshoshili ombelela kakwa li ya wanena omwaalu wovanhu va li koshivilodimbuluko,” ta ti. 

Ngoloneya okwa ti moshikando tashi landula ngeenge moshitukulwa shaye omwa ka kala oivilo ngaashi efiku lomapendafule ile efiku lemanguluko laNamibia nosho tuu, ombelewa yaye otai ka kwashipaleka kutya ovanhu aveshe ova lya. 

“Naame onda uda nai eshi oshitukulwa shange tashi tongwa kutya okwa dja ovanhu inava pewa ombelela. Otashi ulike efano lii,” ta ti. 

Okwa ti okwa kala omutumba nokanguduwiliki oko ka li taka ningi omalongekido oshivilodimbuluko. 

“Onde va pula kutya omolwashike ovanhu inava lya ombelela. Onda lombwelwa kutya ombelela kakwa li ya wanena ovanhu aveshe,” ta ti. 

Kombinga ikwao, Ndeitunga okwa ti ovanhu vamwe ove na eenyala dile, nongeenge va pewa oshinakuwanifa shokuteleka ohava holeke po oikulya. 

“Oikulya oya telekwa kovanangeshefa 11 va yooloka. Aveshe ova futwa kepangelo moshimaliwa N$500 000 osho sha topolelwa oitukulwa okuninga oivilodimbuluko,” ta ti. 

Ndeitunga okwa ti moshikando tashi landula ombelewa yaye itai ka longifa vali ovanhu ovo kwa li va pewa oshinakuwanifwa shokuteleka. 

Okwa yelifa ta ti elalakano opo ovanhu va yandje eemhito kuvakwao ovo navo ve na eengeshefa dokuteleka oikulya. 

Ngoloneya okwa pandula oshiwana molwaashi okwa li sha holoka momwaalu muhapu okuyandja efimaneko kOmukokolipresidente. 

“Ovanhu ove lihumbata nawa. Kape na omalipumomumwe a lopotwa. Onde mu pandula unene amushe kwa li mwa holoka,” ta ti. Ndeitunga okwa ti aishe okwa li ya longekidwa nawa mwa kwatelwa eetenda omo kwa li mu na ovanhu, oipundi neameno la wana. -fhamalwa@nepc.com.na