Ofikola Oshinamumwe Combined School oya findana shaashi oyo ili dingi mounamapya.
Ofikola ei oya li ya findana oN$30 000 oku
dilila kehangano loNamibia Agronomic Board molwaashi ina oshikunino shi li pamufika muwa nosha filwa oshisho.
Epole eli olo lili onomola yetete oyeli finda pefimbo lomaulikilo oipindi ounamapya a li modoolopa Grootfontein oshivike shadja ko.
Pefimbo ta tambula ko epapa omukulunhufikola pofikola Oshinamumwe Combined School Toivo Mupupa okwa pandula unene eshi ofikola yavo ya mona epapa lotete mokukala ina oshikunino hashi longo oikulya ihapu yovanafikola noshoyo pomudingonoko wavo.
Mupupa okwa ti oshikunino oha mu longa ovanafikola aveshe eshi hava kala tava ku nu mo oikonomwa ya yooloka ngaashi ombidi, eenyanga, omapungu, omatama, oikapa, ounakaandesha nosho tuu.
Mupupa okwa ti elalakano loshikunino okulonga oikulya yovanafikola noshoyo okuyambidida oshiwana eshi shi li momhumbwe yoikulya momudingonoko wavo.
“Ihatu lande vali oikulya meefitola shaashi ohatu longo oikulya yetu vene. Ohatu longo oikulya ya wanena ovanafikola vetu aveshe shaashi otuna oshikunino sha kula,” Mupupa ta ti.
Okwa ti ohava ifana ovanhu ve na owino mounamapya opo ve uye va yandje ehongo kovanafikola kombinga yefimano lounamapya opo va kale vawaxwamekwa nokukala ve na eudeko la wana.
Okwa ti epapa e li va findana ota li yandje omukumo kovanafikola opo va twikile okulonga nelitulemo moshikutunino shavo vo va dule okukala va pewa omapapa mahapu natango komesho yeedula.
Mupupa okwa ti oshimaliwa osho va findana otashi ka longifwa okulanda oipumbiwa yo moshikunino unene tuu eembuto noshoyo omiti dokukelela oipuka oyo ha li oimeno.
Okwa twa eefikola dikwao omukumo opo di kala nado tadi ningi oikunino yado meefikola shaashi oikunino oya fimana.
fhamalwa@nepc.com.na