Victoria Kaapanda
Ngoloneya gwoshitopolwa shaShana Elia Irimari okwa ti nonando moshitopolwa omwa holoka omalunduluko gamwe , natango oshindji oshi na okulongwa.
Irimari okwa li ta popi ngaaka esiku kwa li ta totha mo omaupyakadhi oshowo iilonga ya holoka moshitopolwa shaShana.
“Omukithi goCovid-19 ogwa shunitha pevi omauwanawa nomahumokomeho ogendji goshitopolwa shaShana, moka mwa kwatelwa egwo pevi lyeliko,” ta popi ngaaka. Ta ti, omaupyakadhi ga taalela oshigwana moshitopolwa shaShana ngaashi oompito dhiilonga, omalukalwa, omauthikepamwe oshowo omahepeko goomeme naanona momagumbo oge na okutalika natango, na nkene ge na okukandulwa po oshowo okushonopalekwa.
“Pethimbo lyomapekaapeka, oshitopolwa shetu osha lopota iipotha yomahepeko goomeme nuunona ge li 489 oshowo omakwatonkonga ge li 75,’’ ta ti ngaaka.
Ngoloneya natango okwa totha mo kutya oshitopolwa shaShana osha longo nuudhiginini ngele tashi ya kelongo. “Oosikola dhi li 10 otadhi ka gwedhelwa oongulu, omanga Ekuku oshowo Ondiyaala Junior, nadho tadhi ka gwedhelwa oongulukalasa dhi li 16 kumwe,” ta fatulula ngaaka.
Ta gwedha po kutya Oshana osha longa sha itula mo ngele tashi nya koondjila momalelo agehe gatatu.
Ta ti, omauwanwa inaga holoka ashike moondoolopa ihe nokuushayi, hoka kwa tulwa oopaipi dhomeya.
“Miikandjohogololo ayihe 11 yOshana, omwa tungwa uundjugo 70, nelalakano okukaleka po uuyogoki. Okwa longwa wo natango oondjila dhokupita omeya pethimbo lyomeya ogendji,” ta popi ngaaka.
Oondjila dhimwe moshitopolwa shaShana okuya komagumbo nenge koosikola odha kala nokupata ethimbo lyomuloka ogundji.
Elelo lyondoolopa lyOngwediva olyi li metifa okulonga okapale komaudhano hoka taka kotha oshimaliwa oomilliona N$2.1, omanga elelo lyondoolopa lyOndangwa lya tameke okulonga mpoka tapu ka tungwa okapale kongushu yoomilliona dhontumba. Ngoloneya okwa tsu omukumo omalelo goondoolopa agehe gatatu moshitopolwa opo ga gandje omahala gokutungwa uupale womaudhano.
– vkaapanda@nepc.com.na