Iitopolwa imwe yokuumbangalantu woshilongo oyi li monkugo yi na onkambe sho oshitopolwa shoka sha iyadha ishewe sha taalelwa koshipahu.
Oshilongo inashi mona omuloka gwa gwana nuumvo, niilokololmwa yomomapya kuumbangalantu woshilongo oya dhengwa komutenya. Ngashiingeyi, oshitopolwa osho tuu shoka osha taalewa koshipahu shoka sha hanagula po nale iikunonmwa momapya ogendji.
Uuministeli wuunamapya nuuniimuna, omeya nomakuti owa tseyitha kutya iitopolwa Zambezi oshowo Ohangwena oya ponokelwa koshipahu nowa tengeneke kutya otashi ka ya eteyo moshipala.
Muule womasiku gaali ga piti aanafaalama oya kanitha nale oohekita dhi li 10 dhiikunomwa mbyoka ya hanagulwa po koshipahu.
Oshipahu ohashi tuka tashi endelele, tashi kwatwa ookilometa odhindji, noshi li oshiponga oshinene shaashi mpoka tashi nambele ohapa yela mbala oomuma nomafo methimbo owala lyoosekonde.
Ohashi valathana wo tashi endelele nohashi tendula pethimbo lyokufu nopethimbo ngaashi ndika.
Omukuntuwiliki muuminsteli wuunamapya, omeya nomavi Ndiyakupi Nghituwamata okwa ti oshipahu shoka sha ponokele iitopolwa mbyoka oshi li pamaludhi.
“Oshipahu okwa li sha ponokele iitopolwa mbyoka okuza momasiku 29 gaFebuluali nuumvo. KoZambezi osha monika komahala ngaashi koLake Liambezi osho wo koMasokotweni, hoka sha yonagula omapya,’’ ta ti ngaaka.
Nghituwamata okwa kumagidha aakalimo yomomindhingoloko ngaashi Kanono, Kapani, Nakabolekwa, Masikili, Ngoma, Isuswa, Loma, Mukutikila, Ibbu, Mahundu, Ngala, Kapani, Chinchimani, Linyanti, Singobeka, Maunga, Sangwali osho wo Oshikunde moshitopolwa shaHangwena, ya kale uupathi, opo ya lopote mbala oshipahu koombelewa dhookansela nuuminsteli, uuna ya mono omayinyengo gasho
Ta kumagidha kutya kehe ngoka ta ka mona oshipahu na kale a lopota meendelelo opo ku kuthwe onkatu oshoka oshipahu otashi hanagula omapya tashi endelele.
Uuministeli owa tumu aanambelewa opo ya tameke nokutsinina momindhingoloko moka sha monika. Ta ti, oshipahu oshanika wo natango oshiponga kuulithilo wiimuna oshoka iha shi li owala iikunomwa yomomapya, ashike oha shi li wo nomwiindhi.
Nghituwamata okwa gwedha ko kutya uuministeli otau tsikile okukondolola onkalo yoshipahu osho wo okugandja omayakulo taga pumbiwa opo shi sindike.
Uuministeli owa indile oshigwana shi longele kumwe naanambelewa mboka yeli moshikonga, opo ya longele kumwe.
Kehe ngoka ta kala ena omapulo nenge a hala okulopota oshipahu na ndhenge konomola 061 208 7604.
-vkaapanda@nepc.com.na