Charles Ndeumane

OSHAKATI – Oshipangelo shepangelo shaShakati osha ningi epatululo pambelewa lyoshikondo shepango lyiiti yanathigo oshiwike sha zi ko.

Pethimbo a li ta ningi epatululo pambelewa minista guunamiti nomayakulo gopantu omundohotola Kalumbi Shangula okwa ti uuministeli owa ndhidhilike kutya omayakulo gokupanga iiti yanathigo haga ithanwa dialysis services oga simana noonkondo noga pumbiwa meendelelo.

Shangula okwa ti uule woomvula odhindji aavu yokiipangelo yepangelo mboka ya pumbwa epango lyi na sha niiti yanathigo oya kala haya ende iinano iile unene opo ya mone omayakulo ngoka, ishewe epangelo olya kala hali longitha iimaliwa oyindji noonkondo opo li tume aavu mboka kiipangelo yopaumwene, mwaayihe mbyoka epangelo olya kala hali longitha oshimaliwa shoomiliyona dhi vule N$100 kehe komvula.

“Epango lyiiti yanathigo ohali hupitha oomwenyo dhaantu mboka ye na iiti yanathigo itaayi longo nawa yo itayi vulu we okudhinda. Shika otashi vulu okweeta endumbalo lyomeya, oonyata oshowo iimongwa, shoka sha nika oshiponga kuundjolowele womuntu. Ngele inashi endelelwa po okupangwa otashi vulu okweetitha eso. Molwomatompelo ngaka, epango lyiiti yanathigo olya pumbiwa noonkondo adhihe opo ku kuthwe mo oonyata ndhoka dhi li molutu yo ombinzi yi dhindwe. Konima yepango omuntu ota vulu okushuna kiilonga, ota vulu okupashiyona, ota shuna konkalamwenyo ngaashi shito,” Minista ta ti.

Konima sho oonkambadhala dhuuministeli wuunamiti nonkalonawa yopantu dhokupatulula iikondo yepango lyiiti yanathigo miipangelo ngaashi shaWindhoek Central Hospital, Rundu, oshowo Oshakati momumvo 2016, uuministeli owa tamukulula ishewe momumvo 2019. Ngashingeyi iipangelo ayihe mbyoka itatu oyi na iikondo yepango lyiiti yanathigo. Oshipangelo shaWindhoek Central Hospital oshi na omashina goDialysis  16, Oshakati Intermediate Hospital oshi na ge li 15, omanga oshipangelo shaRundu Intermediate Hospital shi na ge li 8.

Kakele kiipangelo mbyoka ya tumbulwa, uuministeli owa andjakaneka omashina ngoka kiipangelo yilwe yepangelo shi ikolelela komwaalu gwaantu miitopolwa mbyoka. Iipangelo yilwe mbyoka ya pewa omashina ngoka ongaashi Keetmashoop District Hospital, Katima Mulilo District Hospital, Walvis Bay District Hospital, oshowo Otjiwarongo District Hospital.

Shangula okwa ti okuza sho oshikondo shepango lyiiti yanathigo sha pwile oku longa muJuuli nuumvo aavu yeli 67 oya pangwa sigo oompaka, mboka aavu ye li 35 yomuyo aape kepango ndyoka.

“Omakonakono giiti yanathigo ge vule 311 oga ningwa sigo oompaka, tashi ulike esimano lyoshikondo shika miipangelo. Esindano ndika otali ulike eitulemo nondjungu yaaniilonga moshikondo shika,” osho Kalumbi a popi ngaaka.

-mrndeumaneraycharles@gmail.com