‘Onda pita nawa ashike ohandi longo ashike momaumbo’
Omukainhu weedula 20 oku li monghalo yomalimbililo, no ita dulu oku ya komesho nelihongo laye molwaashi a anyenwa okamutwe koshilongo.
Okakadona aka vati oka dalelwa moNamibia kuina naxe Ovanamibia novakwapata vavo vahapu ove li moNambia. Ovadalo vako aveshe ova xulifila moNamibia, ashike inakulu oo a dala ina okwa tembukila koAngola ko oko a xulifila.
Ina okwa fya e he na odjapo yedalo, xe okwali e na oufemba weli xwa po, ashike odjapo yedalo yaKornelia Valomboleni womomukunda Eembaxu, moshitukulwa shaHangwena, oya shangwa “non-Namibian”, osho tashi ti kefi Omunamibia.
Okwa kala ashike novatekuli vaye vo ovo va li ve mu kwafela oku mona odjapo yedalo, va longifa odjapo yefyo yaina.
Pefimbo lounona waye, Valomboleni okwali umwe womounona vali va talika ko onga omakanapa, a li nokuli a tofwa a ye kofikola oko haku i ashike ovanamaamo moshilongo yedina koRukonga Vision. Ashike omhito ei okwali ye mu pitilila po shaashi ka li e na ondjapo yedalo. Ta ti eshi osha tukulula ovatekuli vaye opo ve mu kongele odjapo yedalo, va longifa odjapo yefyo yaina shaashi Valomboleni ofiye, ye xe kalushivike apa e li.
“Onda kala handi longifa ondjapo yange oyo ndi wete ashike i li nawa, fiyo omo 2021 eshi nda fikama ndi ye kombelewa yoikwameni mEenhana ndi ka fanekwe okamutwe molwa ekonakono laxuuninwa olo keshe umwe a li ta pulwa okamutwe koshilongo,” ta hokolola.
Omunyasha ou a li ta fikola mosekondele yaHaimbili Haufiku pefimbo opo okwa hokolola kutya okwa haluka eshi omunambelewa emu kufa momukweyo nokulombwe lange kutya ita fanekwa shaashi ondjapo yaye otai ulike kutya kefi Omunamibia, na konge manga xe opo e mu popile.
Nande a li a udifwa nai koshinima eshi Valomboleni okwe li twa omukumo ndele ta shange ekonaakono londodo 12.
Paife eedula dili nhatu e li monghondja, nondjodi yaye koku li hongela oupangi otai ende tai dimi molwaashi ke na oufemba woshilongo. “Onda hala ashike odjapo yange i wapalekwe, Onda hala oku twikila elihongo lange,” ta ti.