ONGWEDIVA – Omunamido 31, Shimwino Simeon, okwa lombwela Kundana kutya ngeno kwapwa li oshitalendi shaye shokufaneka nokuhonga oinima ya yolooka okudilila meembapila oshoyo okupainda, ngeno ondjala oye mu twala konakupila loo oluhepo talu mono po mwene.
Simeon okwa hokolola kutya yee omukalimo womoshitukulwa shaShana noku na ounona vane.
Okwa ti ooina vounona vaye umwe iha nyangadala voo vavali ove li mofikola natango.
Okwa twikila kutya yee oku na eedjapo mbali delihongo lopombada, imwe omo office administration yoo ikwao okwe lihongela eifano lokuhonga oinima ya yooloka ndele fiyo onena ina mona oilonga. “Eshi osha fininika nge natango ndi ke lihongele ouhongifikola koshiputuddilo sha-IUM, pamwe handi mono oilonga,” ta weda po.
Simeon okwa ti manga e lipyakidila nelihongo laye lopombada okwa mona omhito opo a dule okukala ta ende nomaumbo ta kongo ava va hala okupaindilwa oshoyo okufanekwelwa oinima yomaludi e lili nokulili.
Okwa ti eshi ohashi mu kwafa momikalo dihapu ngaashi okufuta otaxi yaye yokomwedi, okufuta ohiila yonduda yaye yokunangala oshoyo okuyambidida ounona vaye apa ta dulu.
Nonando ongao, Simeon okwa ti ongeshefa yaye oya taalela omashongo ngaashi omhumbwe yeekasitoma ile fimbo limwe oha dulu okukala ehe na nande ostoka yeepainda oshoyo oilongifo yokufaneka. “Eshi ohashi dengele nge pedu shaashi ohandi dulu okuninga omafiku amwe inandi tumina sha ounona vange.”
Okwa ti yoo kutya okwa hala kutwa ovanyasha aveshe omukumo ava ve lihongela omaifano e lili nokulili inava mona oilonga tango vaha sholole, ndele nava tameke okunyangadala apa naapenya manga tava mono oilonga.