Kansela Festus Simon Petrus okwa hokolola ota ti ovakalimo vomoshikandjohoololo shaye ova lulilwa keendjaba da lopotwa de liteyela momikunda domOnesi.
Okwa ti Omaandaxa okwa lopototwa kwa monika eendjaba nhee momikunda ngaashi Okahonde, nOshikondiilongo konima omo vati da ponokela nokuhanauna omaumbo.
Petrus okwa ti eendjaba oda longela ovakwashiwana omunyonena eshi da teya po omaumbo avo tadi kongo oikulya, unene tuu omatanga oo di hole.
Okwa didilikwa oshikandjohoololo shaNesi noshoyo shaTsandi oyo imwe hamu lopotwa hai ponokelwa keendjamba.
Omwedi Juli natango moshikandjohoololo shaNeshi okwa li mwa lopotwa eendjaba nhano da teya po omalukalwa ovakwashiwana komikunda da yooloka.
Pefimbo a ninga eenghundafana naKundana kansela okwa hokolola ta ti oshiwana inashi manguluka vali ngeenge tashi ende moixwa ile ngeenge sha nangala shaashi ohashi kala sha kwatwa koumbada wokuponokelwa keendjamba.
“Ovakulupe navo ove na oumbada wokuponokelwa keendjamba ngeenge tava di keenhele dokukwatela opendjela.
Onghee okwa ti eshi osha nyika oshiponga ngeenge ondjamba oya hange okaana ile omukulupe ta ende oye aeke moixwa ile a hangika meumbo shaashi omukulupe iha dulu okufaduka po.
Okwa yelifa ta ti kapena omunhu a lopotwa a xulifa ile omonifwa oshiponga keendjamba fiyo opapa.
“Ovanambelewa va dja kouministeli womidingonoko nomatalelepo ove li yanena moshikandjohoololo shetu tava konakona eendjamba noshoyo okukula ve di shingila kokule,” Petrus ta ti.
Okwa kunghilila oshiwana opo shi kale a lushe tashi lopotele ombelewa yaye diva ngeenge sha mona eendjamba opo a shiive oku lopotela ovanambelewa ha longo noifitukuti.
Pefimbo a ninga eenghundafana naKundana omupopiliko mouministeli womidingonoko Romeo Muyunda, okwa ti eli olo efimbo leendjamba di hole oku endaenda shaashi oha di kala tadi kongo omeva noikulya.
Muyunda okwa ti oshiwana nashi xulife po okutula omatanga, omanuwa nomanyangwa poluhaela shaashi eshi ohashi nane eendjamba, do di ponokele momaumbo avo.
“Ovanambelewa vetu ove li longekida efimbo keshe onghee osha fimana opo oshiwana shi kale tashi lopotele opolifi, nookansela,” Muyunda ta ti.
Okwa kunghilila oshiwana opo shiha tataye eendjamba ile okudi denga shaashi ondjamba otai dulu oku tanauka ndele tai va ponokele.
Okwa weda po ta ti ovanhu nava xulike po oku ende oufiku ngeenge tava di keendingosho shaashi ngeenge kwa laula omunhu ita dulu okumonena po ondjamba.