Omunambelewawiliki wonghalo yomhepo Odilo Kgobetsi okwa kumaida oshiwana opo shi xulife po okushingila oikombo koshi yomiti ngeenge odula tai loko.
Okwa ti osha nyika oshiponga ngeenge oikombo i li koshi yomuti pefimbo lodula tai shela shaashi eshi ohashi eta noupu opo oikombo i kale ya kwatwa koushelu.
Onghee okwa ti okashelu kake hole ngeenge noupu oikombo novanhu i li koshi yomuti pefimbo lodula.
Omaandaxa oikombo omuwoi oya fya eshi ya kwatwa kokashelu pefimbo kwa li ya haama odula koshi yomuti.
Oshiningwanima eshi osha ningilwa momukunda Onaiganga moshitukulwa shaHangwena efimbo lomutenya.
Omudo wa dja ko muDesemba komukunda Okapya okwa lopotwa oikombo 12 nayo ya fya eshi ya kwatwa kokashelu pefimbo kwa li ya haama odula koshi yomuti.
Moshitukulwa shaShikoto na mo omwa lopotwa oikombo 22 ya fya eshi ya kwatwa kokashelu pefimbo kwa li ya haama odula koshi yomuti.
Omudo wadja ko muDesemba moshitukulwa shaHangwena omwa lopotwa ovanhu vatano va fya eshi va kwatwa kokashelu pefimbo kwa li vati tava longifa eengodi dopeke.
Okwa kunghilila oshiwana opo shi halye ombelela yoimuna ya kwatwa kokashelu shaashi osha nyika oshiponga komunhu onghee oshiwana nashi topolelafane ouyelele momikunda opo shi halye ombelela eyo. “Ovanhu ngeenge ve wete odula i li popepi nokuloka nava tameke okuende tava shingi oimuna ya uka popepi neumbo opo ngeenge odula ya tameka okuloka, yoo oimuna tai twalwa koshuunda,” Odilo ta ti.
Odilo okwa weda po ta ti ovakulunhu nava kale tava popi nounona vavo ngeenge va ka lifa opo va kale tava eta oimuna koshuunda ngeenge taku lokwa ndele haku haama odula koshi yomiti mumwe noimuna.
“Oshiwana nashi xulife po okulongifa eengodi ngeenge taku lokwa shaashi ongodi ohai nane noupu okashelu,” ta ti.
Okwa yelifa ta ti okashelu oke hole okukwata ngeenge omunhu ile oshimuna shi li popepi nomuti ule ile neepaale dolusheno.
“Ovanhu nava topolafane ouyelele momikunda davo kombinga youashelu opo va kale tave liufa komilandu nokukelela vaha ninge oikahanwa youshelu,” ta ti.
fhamalwa@nepc.com.na