ONGWEDIVA-Omupopiliko wehangano lokuyandja ohonde loNAMBTS Frieda Vatileni-Asino okwa pula oshiwana opo shi twikile okuyandja ohonde unene tuu ketameko lodula molwashi ehangano ola pumbwa ohonde.

Okwa yelifa ta ti pefimbo lomatango manene ovanhu ova holoka momwaalu mushona okukayandja ohonde.

Vatileni-Asino okwa pula oshiwana opo shi holoke momwaalu muhapu okukayandja ohonde pefimbo olo tava ka taalelapo omandiki a yooloka domoshilongo.

Okwa ti endiki lavo li li moshipangelo shaShakati oha li longo Omandaaxa nEtine, onghee oshiwana na shi ka yandje ohonde shina omukumo.

“Endiki olo lili konhele yomangeshefelo Gwashamba oha li longo Etivali okudja ongula fiyo okomatango,” ta ti.

Okwa ti ngeenge eefikola oda patuluka otava ka enda neefikola mwa kwatelwa oiputudilo yopombada okuyandja ehongo nouyelele nghene sha fimana okuyandja ohonde.

Okwa panduala ovanafikola novalihongi alushe ve na ohokwe yokuyandja ohonde shaashi eshi otashi tu ovanyasha vakwao omukumo.

Vatileni-Asino okwa yelifa ta ti NAMBTS ota twikile okukwashipaleka kutya ovanhu ve li momhumbwe yohonde koipangelo ova pewa ohonde opo eemwenyo davo di xupifwe. 

“Ohonde ei tai yandjwa koshiwana ohai kwafele ovanhu vena omikifi da yooloka ngaashi okaangela, pefimbo oomeme tava pulumuna, omunhu ngeenge ta tandwa nosho tuu omikifi dikwao,” ta ti.

Okwa lombwela oshiwana opo shitopolafane ouyelele kombinga yefimano lohonde opo ovanhu va kale ve na eudeko la wana nokukala ve na ohokwe yokuyandja ohonde.