ONGWEDIVA – Omukulunhuwiliki wouhaku moshitukulwa shaShikoto Joshua Nghipangelwa okwa kumaida oshiwana shi liamene komalaria unene tuu pefimbo eli lodula.

Nghipangelwa okwa ti omudo wa dja ko moshitukulwa shaShikoto omwa lopotwa omivalu dovanhu 720 va kwatwa komalaria nosho yo ovanhu vahetatu va xulifa.

Oshitukulwa shaHangwena okwa lopotwa omivalu dovanhu 1 699 va kwatwa komalaria novanhu vatatu va fya.

Ovanhu 281 okwa li va tambulilwa moshipangelo tava pangwa malaria.

Oshitukulwa shaMusati osha lopotwa omivalu dovanhu 503 va kwatwa komalaria.

Ounona, ovanhu okudja peedula 20 fiyo 40 ovo unene va lopotwa va ninga oihakanwa yokukwatwa komalaria.

Nghipangelwa okwa ti omikunda edi di li kombinga yokeengamba ngaashi Angola naZambia odo unene da ninga oihakanwa yokukwatwa komalaria.

Okwa lombwela oshiwana opo shi liufe komilandu dokulela malaria noshoyo okulopota pefimbo ovanhu tava ulike omadidiliko amalaria.

Okwa ti osha fimana ngeenge omunhu a kwatwa komalaria ile ta ulike omadidiliko ta lopotwa pefimbo opo a dule okupewa omayakulo opaunamiti.

“Oshiwana nashi longele kumwe novanailonga  youministeli wouhaku, ovananhu nava topolafane ouyelele nehongo momikunda kombinga yamalaria,” ta ti.

Okwa ti ouministeli wouhaku onghee ngaa tau twikile nokuyandjaneke eenete dokulela eemwi noshoyo oprongarama yokupombela momaumbo nokuyandja ehongo nouyelele.

Okwa ti ovanhu nave li tuvikile meenete dokukelela eemwe.

“Oshiwana nashi longele kumwe novanailonga vopombela molwashi osha fimana ngeenge momaumbo ta mu twimikilwa opo kukelelwe etandavelo lomalaria,” ta ti.

Nghipangelwa okwa ti oshitukulwa shaye osha taalela omashongo oiyendifo ina i wana okulongifa ngeenge ovanailonga vouhaku tava i komikunda dokokule. 

-fhamalwa@nepc.com.na