Kansela woshikandjohoololo Uukwiyuushona Andreas Amundjindi ota ti moshikandjohoololo shaye omu hadi oshiwana shovayelele shi li moluhepo, sha pumbwa omakwafo ngaashi oikulya noshoyo oidjalomwa.
Amundjindi otai indile moshiwana opo shi yambidide ovayelele noikwafifwo ya yooloka shaashi paife oshiwana oha shi kala alushe kalela ombelewa yaye tashi kwena oluhepo omanga vamwe oha piti eengula va uka keendingosho eshi vehe na mo sha oikulya momaumbo.
Kasnela okwa yelifa ta ti oshikandjohoololo shaye osho shi na omwaalu muhapu woshiwana shovayelele eshi mu na omaumbo 41 hava di momikunda da yooloka.
Amundjindi eshi a ninga eenghundafana naKundana okwa hokolola ta ti no nande epangelo ha li ningi eenghendabala nokuyandja oikulya koshiwana shovayelele iha i kala ya wana shaashi omaumbo ovayelele okwa ninga mahapu.
Okwa ti ovakulupe vamwe otava tekula ovatekulu vahapu ve va fiilwa kounona wavo ashike oikulya iha i kala ya wanena ovaneumbo shaashi meumbo oha u kala mu hadi.
“Ovayelele vamwe ova pumbwa eenduda dokunagala shaashi ohava kala va ninga oihakanwa yokulokwa kodula omanga manga vamwe ova pumbwa oikumbafa yokulongifa pefimbo loutalala,” kansela ta ti.
Amundjindi okwe weda po ta ti ounona vovayelele ohava ninga oihakanwa yokufiya po ofikola shaashi ohava kala tava dengwa koluhepo omanga vamwe ova kala va lambalala onghalo yookendingosho.
“Ngeenge owa i keendingosho efimbo longula oto hange ko ounona vashona ve li novadali vavo tava nu omalodu eshi va fiya po ofikola. Onda ninga eengheendabala dokupopya navo ashike onghee ngaa tava twikile noku fiya po ofikola,” ta hokolola.
Okwa weda po ta ti ombelewa yaye oye shipondola okukala ya ninga omalongekido okuyandja omaufemba koshiwana shovayelele ve li moshikandjohoololo shaye.
“Ounona, ovanyasha novakulupe ve li moshikandjohoololo shetu ova mona omhito yokupewa omaufemba. Onghee vahapu ohava mono omayakulo opashiwana keembelewa da yooloka,” kansela ta ti.
Ku keshe ou e na e halo lokuyambidida oshiwana shovayelele na kale a kwatafana nombelewa yakansela.