Oshiwana shovayelele otashi dengwa konghana onghee paife osha ninga oipute nomakaka kolutu.
Oshiwana shovayelele ohashi di momapundo e li momukunda Omalalapapa moshikandjohoololo Omundaungilo, moshitukulwa shaHangwena.
Pefimbo Kundana a talela po omapundo avo oshiwana osha hokolola tashi ti osha kala nokuvela onghana oule weemwedi mbali ashike fiyo opapa inava mona epango.
“Ohatu likosho ashike nomafo omiti twa tula mo omongwa. Ihatu kofa molwaashi ohatu kala hatu nyuwa efimbo keshe,” umwe ta hokolola.
Ovakulupe, ovanyasha nouona mwa kwatelwa okaana keemwedi nhatu ova ninga oihakanwa yokukwatwa konghana.
Oshiwana shovayelele osha vela kansela wavo ombedi Festus Ikanda molwaashi vati a dopa okushivafila ovanambelewa vouhaku opo va dule okukala va mona epango diva.
Eshi a kwatafana naKundana omunambelewa wouhaku koshipangelo shaCentral moWindhoek noku na owino momikifi da yooloka, Dr Laimi Ashipala okwa ti onghana ohai tandavele momikalo da yooloka ngaashi meenhele da kaka di hadi ovanhu. Onghee okwa ti ekako olo unene li li oshietifi shonghana moshiwana.
“Onghana ohai tandavele noupu ngeenge omunhu e na onghana a ya mekwatafano nomunhu mukwao. Onghee osha fimana opo omunhu ngeenge a kwatwa konghana aha kale mokati kavakwao shaashi ota dulu okutandandaveleka onghana noupu,” Ashipala ta ti.
Okwa weda ta ti osha fimana ngeenge omunhu a kwatwa konghana opo a twalwe koshipangelo diva molwaashi onghana ohai dulu okupangwa.
Ashipala okwa yelifa ta ti omunhu oha dulu okukala nonghana oule wefimbo lile ngaashi oivike itatu ile oule womwedi.
Helaria Haule weedula 88, noku li omukuluhu womapundo okwa hokolola ta ti iha dulu vali okulonga oilonga yaye molwashi paife okwa ninga oipute keenyala.
“Inatu mona nale onghana ya nyika oshiponga ya fa ei.
Okudja omudo 1976 twe ya pomapundo apa inatu vela nale onghana,” Haule ta ti.
Helena Hamutenya e na okaana keemwedi nhatu ka kwatwa konghana noshoyo ounona vanhee okwa hokolola ta ti ounona vaye ohava kala alushe tava kwena ngeenge tava nyuwa. “Ka shipu okaana kashona ngeenge ke na onghana molwashi iha ka dulu okulinyaya vene, onghee naashi oha shi eta opo okaana ka kale ta kwena,” Hamutenya ta ti.
Eshi a kwatafana naKundana kansela woshikandjohoololo shaMundaungilo Ikanda okwa ti keshi ngeenge oshiwana shovayelele osha kwatwa konghana.
“Otava lundile nge, ka ndina ouyelele kombinga yonghana moshikandjohoololo shange,” Ikanda ta ti.
Omuku lunhuwi l i k i wouhaku moshitukulwa shaHangwena Johannes Hango okwa ti ombelewa otai ka tuma ovanambelewa wouhaku kOmundaungilo opo va ka ninge omapekapeko kombinga nghene oshiwana shi na okupewa omayakulo ouhaku. fhamalwa@nepc.com.na