OMUNDAUNGILO – Oshiwana shovayelele otashi pula epangelo opo li wedele oikulya yoshikukuta noukutu vatatu keshe momunhu molwaashi oukutu voufila ihava kala ve va wanena.
Pefimbo Kundana a talela po omapundo oshivike sha dja ko, opo hapa di ovayelele komukunda Omalapapa moshikandjohoololo shaMundaungilo koshitukulwa shaHangwena, ova hokolola tava ti ova pumbwa oikulya ya wana molwaashi momapundo omu hadi ovayelele paife.
Omapundo onhele yomaumbo oyo hai di oshiwana shovayelele noku li a dikwa noiti.
Oshikandjohoololo shaMundaungilo osho shimwe sha didilikwa shi na omwaalu muhapu woshiwana shovayelele hashi di komapundo a yooloka.
Ovayelele ova kala mo efimbo lile mOmundangilo okudja momudo 1980.
Ruusa Haihambo weedula 89 okwa hokolola ta ti mepundo laye ohamu di ovanhu 13 mwa kwatelwa outekulu vaye.
“Otwa pandula epangelo letu molwaashi ohatu pewa oikulya yoshikukuta oukutu vavali mepundo keshe ashike otwa hala oukutu va wedelwe,” ta ti.
Okwa hokolola ta ti okakutu koufila kamwe ohaka ningi omafiku atatu molwaashi mepundo omu hadi ovanhu.
Haihambo okwa ti epangelo otali twikile oku va tonatela molwaashi oha kwata noshimaliwa shopendjela.
“Ngeenge oufila wa pwa po ohandi longifa oshimaliwa shange shopendjela oku ka landa oufila noshivelelwa,” ta hokolola.
Okwa weda po ta ti omafimbo amwe ngeenge oufila wa pwa po oha tumu ovatekulu vaye keendingosho opo va tekele ovanhu omandini omeva ndele tava pewa omakopi oufila.
Thomas Hamupunda okwa pula ovanangeshefa novaleli vopapolitika opo ve va yambidide noshivelelwa molwaashi otava dengwa komukaa.
“Paife ohatu li omwai wa dja momanghete. Ohandi ka konga omanghete momufitu opo ovaneumbo vange va dule okuvelela omwai,” Hamupunda ta ti.
Hamupunda okwa ti okwa pandula epangelo molwaashi ove li popepi nomeva a yela oo haa di meemboola.
“Okwa li twa pewa oikumbafa nosho yo omaano a yooloka okudilila kepangelo,” ta ti.
Hamupunda okwa popya ta ti ova teelela eshongo lovanhu hava vake po oikulya yavo momapundo.
“Ngeenge owa yi keendingosho oto hange oukutu voufila va tumbwa mo kookalyamupombo,” ta ti.
Eshi a kwatafana naKundana omunambelewa ta longele koshikondo shokutonatela oshiwana shovayelele novanhu ve na oulema moshitukulwa shaHangwena, Thomas Puleinge okwa ti ovayelele ohava pewa oikulya ya wana okudilila mombelewa yaye.
“Ombelewa yange otai kwashilipaleke kutya kape na omuyelele ta fi kondjala,” ta ti.
Okwa yelifa ta ti konima yoivike itatu omuyelele keshe okwa li a pewa oukutu vavali voufila.
Okwa ti ombelelwa yaye oya taalela eshongo linene kombinga yovayelele tava landifa po oukutu voufila keendingosho.