EPEMBE – Omunambelewa wouhaku moshitukulwa shaHangwena Kulla Haikali okwa ti oshiwana shovayelele novanahambo ovo tava ka pewa tete eenete deemwe. Okwa ti okwa didilikwa oshiwana shovayelele novanahambo ovo unene va ninga oihakanwa yokukwatwa kumalaria molwaashi hava kala ve li momhumbwe yeenete.
Edi Haikali okwe di popya oshivike sha dja ko pefimbo ngoloneya waHangwena a talela po oshikandjohoololo shaPembe nokwa li a shakeneka oshiwana.
Pefimbo lomutumba Haikali okwa li ta yandje ouyelele nehongo koshiwana kombinga yomikifi da yooloka unene tuu malaria.
Okwa yelifa ta ti neudo oshitukulwa shaHangwena osha pewa eenete 18 750 nota di tuminwa koipangelo nomandiki ouhaku di topolelwe oshiwana.
Moshitukulwa shaHangwena okudja omudo wa dja ko osha lopota omivalu dovanhu va kwatwa kumalaria ve li 1 339 nomafyo ovanhu vane va xulifa.
Oshipangelo shaNgela osha lopota ovanhu va kwatwa kumalariave li 676, Eenhana 430, omanga Okongo 233.
Oshipangelo shaNgela osha lopota omivalu di li pombada molwaashi oshi li kombinga yokeengamba daAngola omo hashi yandje omayakulo ouhaku kovakwashiwana Ovaangola vahapu.
Onghee malaria oha tandavele noupu kombinga yokeengamba molwaashi ovanhu vamwe ohava di mOangola va kwatwa nale kumalaria. Okwa kumaida oshiwana opo shi longele kumwe novanailonga vopombela ngeenge tava pula vaye momaumbo avo va ka pombele.
“Osha fimana ngeenge meenduda tamu twimikilwa omiti opo ku kelelwe etandavelo lomalaria,” ta ti.
Okwa ti ovanhu ve na omadidiliko oshidu malaria nava lopotwe pefimbo opo va pewe epango lopaunamiti.
–fhamalwa@nepc.com.na