Ovakwashiwana vomoshikandjohoololo shaGuinas otava hokolola noluhodi tava ti ova fiwa moluhepo kukansela wavo Elias Barney Martinus ou a xulifa Omaandaxa.
Martinus okwa xulifa efimbo longula moshipangelo shaTsumeb. Okwa li e na omido 51.
Ovakwashiwa va dja komikunda da yooloka otava hokolola tava ti ova kanifa omuleli woshi li omulumenhu e na olukeno noshiwana nokuhole okuyambidida ovanhu.
Martinus oye umwe a kala eli tula mo meyambidido neyambulepo loshiwana shovayelele moshikandjohoololo shaye.
Kansela okwa li alushe a yandje oikumbafa koshiwana shi li moluhepo pefimbo loutalala.
Ovanhu vahapu ova mona ouwa okupitila mombelewa yakansela ngaashi okupewa omaufemba nomidjalofikola dovanafikola.
Konima yeemwedi mbali Martinus okwa li a yandja oikutu koshiwana shovayelele noikulya.
Martinus okwa kala alushe ha popi ta ti, “Ina ndi hala moshitukulwa shange mu lopotwe omunhu a fya kondjala.”
Omafimbo amwe kansela oha longifa oshimaliwa shaye mwene okulandela ovanhu oikulya molwashi kombelewa yaye oha kukala kwa ngudumana ovanhu tava kwena ondjala.
Kansela okwa li a yambidida okamatyona Lucas Tsameb a shivika nawa irivari ou a kala modolongo efimbo lile ndele te mu futile oboolofa yoshimaliwa eeN$2000.
Naame Vilho omukalimo womOshivelo okwa hololola ta ti alushe ngeenge moshikandjohoololo shavo muna omunhu a taalela omashongo okufudika omukwapata waye, Martinus oha yambidida.
“Okwa li a yandje notuwa yaye opo li longifwe okumbata omudimba,” ta ti.
Ngoloneya woshitukulwa shaShikoto Penda Ya Ndakolo okwa tanga Martinus onga omulumenhu omulineekelwa e hole okulonga oilonga yaye pefimbo.
“Okwa kala alushe ha wa nifa po oilonga yaye pefimbo. Otwa ka nifa omulumenhu omunambili nokuna elandulafano,” ta ti.
Ya Ndakolo okwa ti alushe ngeenge ehe li mombelewa oha fiya po Martinus opo a longe po oilonga yaye molwashi okwa li emulineekela.
“Ngeenge moshitukulwa muna oivilo yonhumba ohandi tu mu ko Matinus opo a ka kalelenge po. Okwa li omulumenhu e na oshili,” ta ti.
Ngoloneya okwa yandja omahekeleko kofamili yakansela noshoyo koshiwana moshitukulwa ashishe.
Martinus okwa ulikwa a ninge kansela momudo 2020.
Okwa fiya po ounona vane nomalongekido epako oku li metifa.