WINDHOEK Oshakati okwa thanekwa mu tungwe omagumbo ogendji sha landula kegandjo lyomukuli gokapandi N$30 million kOmbaanga yOmapendulopo yaNamibia (Development Bank of Namibia – DBN) kehangano lyopashigwana lyokutunga omagumbo (National Housing Enterprise – NHE). Poshituthi sheshaino lyetameko lyelongelokumwe pokati koDBN noNHE mOvenduka metiyali, Omunambelewa omukuluntu goDBN, David Nuyoma okwa ti ehangano lyawo olye shi tala ko shi li mondjila okukutha ombinga momapendulopo gomagumbo, oshoka oNHE oya pumbwa aalongelikumwe naye. Ehangano lyoNHE okwa li lya pewa oshimpwiyu shika kEpangelo okutunga omagumbo ge li 7 937 muule woomvula ntano tadhi landula ngaashi sha shonekwa kOproholama Ontiyali yOpashigwana yOmapendulopo, kakele oprojeka ndjika okwa li ya tsakaneke omaupyakadhi gompumbwe yevi – omahala gokutunga omagumbo ngoka ge na iiyakulitho ayihe. “Ehangano (NHE) ngashingeyi otali iyunganeke okugwanitha po oshimpwiyu shalyo shika pakumona nokutula mo lyoyene iiyakulitho mevi/omahala, naashika otashi ka endeleleka etungo lyomagumbo moshilongo ashihe.” omunambelewa ta ti. Okwa tengenekwa kutya gumwe gomaanegumbo omulongo ohaya lumbu momagumbo giinyakwi oshowo moonkalo dhilwe dhaa na uuyogoki moNamibia. Onkee oprojeka oya dhiladhililwa okunengeneka onkalo yoluhepo lwomagumbo unene moondoolopa adhihe dha simana moshilongo. Oprojeka ndjoka mOshakati, Nuyoma ta ti, otayi ka tameka noproholama ndjika okupitila momapendulopo gaakalimo mboka ye na iiyemo iishona naambyoka yopokati molukanda Ehenye. Oshimalliwa shoodola N$30 million oshi li oshitopolwa shotango moka iiyakulitho ngaashi omiligu dhomeya gonyata tadhi ka tungwa oshowo omiligu dhomeya gokopomba tadhi ka tulwa mo. Ondondo ontiyali otayi ka kwatela mo oondaama dhomeya gonyata, omanga ondondo ontintatu tayi ka kwatela mo oondjila, oopate nomagumbo. Nuyoma okwa ulike kutya oprojeka ayihe otayi ka pula okapandi koodola N$300 milion. Ondoolopa otayi ka likola mo omauwanawa ogendji moproholoma ndjika. Shika osha kwatela mo embalipalo lyiiyemo noompale dhoka tadhi likolwa kelelo lyondoolopa, oshimaliwa shoka sha thikama po pethimbo ndika ashike maanamagumbo 2 000 mboka haya futu iifendela yomondoolopa. Oprojeka ndjika okwa tegelelwa wo yi ete po uundjugo wopashinanena, omeya gokopomba oshowo egandjo lyomalusheno kaakalimo 14 000 (mboka ya thikama po moopelesenda 0.7 dhaakwashigwana ayehe moshilongo) mondoolopa ndjika. Osikema ndjika okwa tegelelwa wo yi kwatele mo oongeshefa oontshona nomahangano gopondondo yopetameko okuza moshitopolwa pethimbo lyetungo lyomagumbo nokweeta po oompito dhiilonga. Nuyoma okwa yelitha wo kutya omilandu dhegandjo lyootendela dhiilonga otadhi ki iyuthwa kudho mokugandja ookondalaka komahangano/ookampani dhoka dhi na eitulomo moprojeka. DBN oya totelwe po Paveta yOparliamende muKotoba 2002 okugandja omakwatho gopashimaliwa kiikondo mbyoka iipondoli meliko nelalakano okupendula po eyokomeho lyiikondo yemona moshilongo. Omikuli ohadhi pewa iikondo yepangelo naambyoka yopaumwene. Egandjo lyoshimaliwa koongeshefa oontshona naadhoka dhopokati ohali ningwa wo paihohela yopevi lela.