Ovafuko vahapu ove likwete pomutima, kutya otashi dulika vaha ka wanifile ovaenda keehango davo osilae omolwondado yoihakautu oyo ya londa neenghono.
Elondo londado vati ola etifwa koshikukuta osho sha etela ovanafaalama vomoshilongo vaha lime oihakautu. Onghalo ei oya etela oshilongo opo shi likolelele kuSouth Africa oo naye yoo e na omaupyakadi noina dula okulonga oihakautu ngaashi shito.
Okudja omudo wa dja ko, ondado yoihakautu oya londa konyala neepelesenda di dulife po250. Okashako koihakautu ko-10kg meefitola dimwe monooli oke na oN$365, omanga apa ke na ombilixa ke li poN$200. Eshi otashi yelekwa nondado yoshito oyo i li pokati koN$80 noN$100.
Ofitola yoihape yepangelo yoAmta, oko vahapu have lididimikile yo kai na nande okashako kamwe.
Umwe womovafuko va lulilwa kondado yoihakutu Foibe Haitula, okwa tumbula kutya ohango yaye otashi dulika i ke mu fiye nondjato i na ombululu shaashi oimaliwa yaye otai ka pwila moihakautu.
“Meefitola dihapu oihakutu oi li koN$200, omanga kudimwe tai keelelwa koN$300,” Haitula ta tumbula.
Okwa twikila kutya yee okuwete te ke lihaluka ta ka longifa oshimaliwa sha pitilila, noinima yaye imwe oya pita i ka kale inai henena. “Ame kohango yange ohandi uya ndi mu pe oshifima nombelela, itandi dulu okulanda oihakautu koN$365, omufuko umwe osho a nyola koSocial media.
Omunambelewa Omukulunhu waAmta konooli Jacob Amutenya okwa ti kutya ondado yoihakautu oya londa shaashi Namibia ina longa oihakautu.
Ta ti oshilongo osha li sha dengwa koshikukuta nosha ninga efimbo lile inashi kuna oihakautu.
“Neudo nokuli otwa likola ashike eetona di li 450 moshilongo ashishe. Ovanafaaalama vahapu inava kuna oihakutu shaashi ohai pula onhele yedu ihapu. Shikwao vali oihakutu ohainyanyala, shima ashike wa ningi epuko lishona, ngaho oshinenga ashishe osha ipala,” Amutenya ta tumbula.
Okwa twikila kutya natango eshi shal ondifa ondado yoihakautu osheshi kutya South Africa ou ha landifa oihakautu kuNamibia naye eteyo laye otali ende tali shongola hangaashi sha li nale.
Okwa ti yoo kutya South Africa oku na olusheno hali uhala tali u ko, efundja la li mo neenghalo domhepo da yooloka nado vati odi na oudjuu keteyo loihakautu.
Okwa yelifa yoo kutya nonande ongaho natango South Africa oha dulu okuteya oihakautu tai wanene Namibia aveshe naAngola, ashike okondado i li pombada lela.
“Fye ava hatu mbestele eestoka doihakutu koSouth Africa ohatu i lande lela kondado i li pombada, shee eshi hatu ya moNamibia nashe kondado hatu siteleko vali,” Amutenya ta ti.
Nonande ongaho, Namibia vati okwa teelelika a ka teye eetona da fika po1 400 kexulilo lomwedi ou ile petameko lomwedi twa finda.
“Eshi otashi ka vatela yoo ovanageshefa vahapu shaashi otava ka mona omhito yokuteka eestoka davo. Ondado yoihakautu nayo otai ka shuna pedu, novafuko pamwe tava ka dula ngoo nee ngaho okulanda kondado ta nuwa omeva,” Amutenya ta ti.