Charles Ndeumane
ONGWEDIVA – Omuleli gwongundu yoAction Democratic Movement (ADM) Vincent Kanyetu okwa uvanekele Aanamibia oshimaliwa koomuma, oompito dhiilonga, nomauwanwa galwe ogendji.
Kanyetu okwa popi ndhoka sho a li moonkundathana noshifokundaneki shika, ta ti moshilongo omu na oonzo dhopaushitwe dha gwana ok topolelwa Aanamibia ayehe oshimaliwa. Ta ti ngele ongundu oya sindana po omahogololo ota yi ka gandja oN$100,000 kukehe Omunamibia konima yoomwedhi ndatu kehe.
“Kehe omina yi li moshilongo ohayi gandja oopelesenda mbali dhiiyemo mbyoka hayi mono okuza moonzo dha yooloka koshiketha shoka sha totelwe po komupresidente omukulu omundohotoloa Hage Geingob. Iimaliwa mbyoka oya pungulwa moshiketha opo anuwa yi longithwe monakuyiwa. Omolwashike oshilongo tashi pungulile onakuyiwa manga aantu taya si ondja mongashingeyi? Ngele ongundu yetu oye shi pondola momahogololo iimaliwa mbyoka otayi ka topolelwa Aanamibia ayehe, kehe omuntu ota ka pewa oshimaliwa N$100,000. Mboka ya hala okutota oongeshefa dhawo taya toto oongeshefa dhawo, taya landa iinima mbyoka ya pumbwa opo ya yambule po oongeshefa dhawo.
Anuwa mepangelo lyo-ADM itamu kala oomimista dhi na oongeshefa, odhi na okuhogolola po shimwe pokati kokukala aanangeshefa nokukala oominista. Shoka osha kwatela mo aanapolitika yoonkantu dhopombanda ngaashi oongoloneya, ookansela, oshowo aakuluntuwiliki yomahangano gepangelo. “Oominista naaleli mboka ye li ko paife otaya dhipaga oongeshefa dhAanamibia oshoka oyo ashike ya kwata ko oongeshefa adhihe yo oye li nale mepangelo, ha mono iimaliwa oyindji nomauwanawa ogendji. Aanamibia oyo taya ka pewa oompito dhongeshefa mepangelo lyetu. Kashi li nawa aantu ya za pondje yoshilongo ya kwata ko oongeshefa moshilongo manga Aanamibia taya hupu nuudhigu,” Kanyetu a ti.
“Kehe osikola otayi ningilwa oshikunino opo yi kale tayi ilongele iikwamboga yawo. Shika otashi ka kondjitha oshikukuta nonkalo yiikulya inaayi gwana. Aanasikola otaya ka pita nawa oshoka oya paluthwa nawa, aanasikola itaya ilongo nawa ngele oya sa ondjala,” osho Kanyetu a gwedha ko.
Kanyetu okwa tsikile ta ti ADM otayi ka tula aapangi poosikola adhihe moshilongo opo ku yandwe uunona wosikola naapangi taya ende iinano iile okuya kiipangelo uuna ya kwatwa kuuvu manga ye li koosikola.
“Otatu ka kwashilipaleka kutya kehe osikola moshilongo oyi na omayakulo gopaunamiti, otatu tula omupangi gumwe nenge yaali posikola, shi ikolelela komwaalu gwaanasikola mboka ye li po. Otapu kala okandunda moka tamu longele omupangi oshowo okupungula iikwa niipangitho. Omayakulo ngoka itaga ka pewa ashike aanasikola naalongi ashike ota ga ka kala ga egulukila aakwashigwana popepi noosikola ndhoka. Kakele ko ku eta omayakulo gopaunamiti popepi noshigwana shika ota shi etapo oompito odhindji dhiilonga opo tu kuthe aanona mboka ya ilongela uupangi momapandaanda,” osho Kanyetu a popi ngaaka.