OSHIKUKU – Omuloka omwaanawa ngoka gwa monika monooli oshiwike sha zi ko, ogwa nyanyudha oyendji.
Nanas Nghinamanhu ngoka ha landitha iikulya mOshikuku pehala tali ithanwa Takes Time okwa ti, iikulya mbyoka a kala nokulanditha kayi na manga oshilonga oshoka shimboto ota dhana manga onkandangala.
“Ookasitoma otadhi pula ashike omafuma, itadhi landa we onyama yoshikombo. Okuza ongula ongodhi yandje otayi dhengwa itayi fudha po kookasitoma,” ta popi ngaaka.
Ta ti, oha kwata ondjuhwa komulungu, ta ka konga omafuma momukunda gwawo oshowo pomikunda dhopopepi.
Nghinamanhu okwa ti, ngele okwa landa omafuma goN$200, ngoka ha landa limwe koN$10, oha mono ovenisa N$500 nenge ya pita po, oshoka oha landitha koondando dha yooloka.
“Okuteleka shimboto kape na ngoka e vule ndje mondoolopa yaShikuku, sho osho ookasitoma tadhi tondokele kungame,” ta popi ngaaka.
Ta ti, omafuma ihaga telekwa niinima oyindji, ohaga pula ashike omongwa nomagadhi, uuselesese ohau tulwa mo kwaangoka a hala sha ikolelela kwaashoka e na.
Martin Johannes gomomukunda Okando okwa ti, ohaya tegelele omafuma ga zime opo ya tameke oka ga kwata.
“Omafuma ngele inaga zima, inaga pumbwa okuliwa ohaga etele aantu okaketaketa, kokutya inaga adha ethimbo lyokuliwa,” ta fatulula ngaaka.
Ta ti, omafuma ethimbo lyokwenye ohaga kala kohi yevi, nongele omvula ya loko taga valathana nokuya kombanda.
Ta gwedha po kutya okukwata omafuma kaku shi okupu, oshoka omuntu oku na oku ga ondelela, opo kaaga nukile kokule naye.
“Ohandi landitha okapandi, ge li ko gatano N$50. Omafuma oge na ookasitoma okuyelikanitha noohi,” ta tanga ngaaka.
Johannes ta ti, ngele okwa thikama kooha dhopate nomafuma iha kala po nominute odhindji, oga pwa po nale, ihe oohi ohadhi kala po ethimbo inaadhi pwa po.
Selma Andreas a yambukile kOmpundja okwa ti, oha teleke omafuma pondje niikuni, oshoka ngele oga telekwa komasiga goshinanena ihaga pi nawa.
“Omafuma omatoye ashike ngele ga talekwa ga pya nawa. Kehe gumwe oha teleke omafuma momukalo ngoka a hala,’’ ta popi ngaaka.
Ta ti, koonyama adhihe, onyama yefuma kuye oyo ashike ya shiga ko.
– vkaapanda@nepc.com.na